माओवादीका आङ्बोलाई कोशीको मुख्यमन्त्री बनाउने गठबन्धनको निर्णय, कांग्रेसका कार्कीलाई एमालेको समर्थन

२५ असोज, काठमाडौं । सत्ता गठबन्धनले कोशी प्रदेशको मुख्यमन्त्रीमा माओवादी केन्द्रका प्रदेश संसदीय दलका नेता इन्द्र आङ्बोलाई अघि सार्ने निर्णय गरेको छ । बालुवाटारमा बिहीबार बसेको बैठकले माओवादीलाई मुख्यमन्त्री दिने सहमति गरेको हो । उता, नेपाली कांग्रेसका प्रदेश सांसद केदार कार्कीलाई नेकपा एमालेले समर्थन गर्ने भएको छ ।  

यसअघि कांग्रेसले मुख्यमन्त्री लिएको थियो । कांग्रेसका उद्धव थापाले दुई पटक मुख्यमन्त्री बन्दा पनि विश्वासको प्राप्त गर्न सकेका थिएनन् । उनले विश्वासको मत लिने प्रक्रियामै असंवैधानिक बाटो प्रयोग गरेका थिए । अब फेरी कांग्रेसकै मुख्यमन्त्री बन्दा विश्वासको मत पाउने आधार नदेखिएपछि गठबन्धनले माओवादीलाई दिने निर्णय गरेको हो । 

कांग्रेसका प्रमुख सचेतक रमेश लेखकले संविधानको धारा १६८ को उपधारा ५ अनुसारको मुख्यमन्त्रीमा माओवादीका इन्द्र आङ्बोलाई अघि सार्ने निर्णय गरेको जानकारी दिए । तर, कोसी प्रदेशको मुख्यमन्त्रीमा माओवादीका नेता आङ्बोलाई अघि सार्ने केन्द्रीय सत्ता गठबन्धनको निर्णयप्रति नेपाली कांग्रेसका केही सांसदले असन्तुष्टि जनाएका छन् । नेता शेखर कोइराला पक्षधर प्रदेशसभा सदस्यले आङ्बोलाई मुख्यमन्त्रीमा समर्थन गर्न नसकिने चेतावनी दिएका छन्  ।

कोसीको मुख्यमन्त्रीमा कांग्रेसका केदार कार्कीलाई अघि सार्नुपर्नेमा उनीहरूले जोड दिएका थिए । तर, बिहीबार काठमाडौंमा बसेको गठबन्धनमा आबद्ध दलका नेताको बैठकबाट आङ्बोलाई मुख्यमन्त्री बनाउने निर्णय गरिएको हो । कार्की मुख्यमन्त्री बन्नुपर्ने पक्षमा रहेका कांग्रेसका नौ प्रदेशसभा सदस्यले गठबन्धनको निर्णयप्रति असन्तुष्टि जनाएका छन् । 

कोइराला पक्षधर सांसदले सरकार गठन गर्न नेकपा (एमाले)का प्रदेशसभा सदस्यसँग छलफल नै गर्ने भएका छन् । छलफल गर्न तयार रहेको यसअघि नै एमाले संसदीय दलले जनाएको थियो । बिहीबार विराटनगरमा आयोजित एक कार्यक्रममा कामचलाउ सरकारका मुख्यमन्त्री हिक्मत कार्कीले पनि संस्थागत निर्णय गरेर आउने दलका सांसदसँग छलफल गर्न कठिनाइ नभएको बताए । उनले भने, हामीले मध्यावधिमा नजाने, बरू सहकार्य गरेर अघि बढ्ने विषयमा सकारात्मक रहेको बताइरहेका छौँ । आज पनि त्यही भन्छौँ ।

एमाले मुख्यमन्त्री हिक्मत कार्कीले राजीनामा दिएपछि प्रदेश प्रमुख परशुराम खापुङले शुक्रबार साँझ सम्म मुख्यमन्त्रीको नाम सिफारिस गर्न समय दिएका छन् । आङ्बोलाई अघि सार्दा राप्रपाले सहयोग गर्ने सम्भावना छ । एमालेका कार्कीले कांग्रेसका केदार कार्कीलाई समर्थ दिने संकेत दिएका छन् । यसो भएमा कोशीमा सत्ता गठबन्धनको निर्णयको विपक्षमा कार्की मुख्यमन्त्री बन्ने छ । कोइराला पक्षका सांसद र एमाले गरी कार्कीका पक्षमा बहुमत पुग्छ ।