कांग्रेसको कोशी प्रदेश कार्यसम्पादन समितिको बैठक जारी

२६ असोज, काठमाडौं । कोशी प्रदेशमा मुख्यमन्त्री नियुक्ति प्रक्रियामा कांग्रेस प्रदेश सांसदहरुले गरेको ‘विद्रोह’लाई लिएर छलफल गर्न कांग्रेस कोशी प्रदेशको कार्यसम्पादन समिति बैठक जारी छ । 

अपरान्ह १२ बजे सुरु भएको चलिरहेको एक नेताले बताए । मुख्यमन्त्रीका लागि एमालेको साथ लिएर कांग्रेस ८ सांसदले केदार कार्कीलाई अगाडि सारेपछि कांग्रेसमा आन्तरिक विवाद उत्कर्षमा पुगेको छ । कार्कीसहित ८ जना सांसदबारे निर्णय लिन बैठक बसिरहेको हो । 

प्रदेशको मुख्यमन्त्रीमा कार्की र कांग्रेससहित गठबन्धनले माओवादी केन्द्रका इन्द्र आङबोलाई अगाडि सारेका छन् । कोशीमा एमाले ४०, कांग्रेस २९, माओवादी केन्द्र १३, एकीकृत समाजवादी ४ र जसपा १ गरी ९३ सदस्य छन् । मुख्यमन्त्रीका लागि ४७ सदस्यको समर्थन आवश्यक पर्दछ ।

कार्की पक्षका सांसदहरु नेता डा. शेखर कोइराला पक्षधर मानिन्छन् । उनीहरुले आफूहरु निर्णयबाट पछि नहट्ने बताइरहेका छन् । संस्थापन पक्षले भने कारवाही गर्ने संकेत दिएको छ । नियुक्तिका लागि आज बेलुका ५ बजेसम्म समय तोकिएको छ ।

काेशीमा प्रदेश सांसदहरूकाे विद्राेहबारे निर्णय लिन कांग्रेसकाे संघीय संसदीय दलकाे बैठक पनि बस्दैछ । दलका नेता पार्टी सभापति शेरबहादुर देउवा छन् ।