उदयपुरका विभिन्न स्थानमा प्रहरीले गर्यो गाँजा खेती नष्ट

२८ असोज, काठमाडौं । प्रहरीले उदयपुरको विभिन्न स्थानमा गाजा खेती नष्ट गरेको छ । जिल्ला प्रहरी कार्यालयले सञ्चालन गरेको ७ दिने अवैध गाँजा खेती नष्ट अभियान अन्तरगत बेलका नगरपालिका र ताप्ली गाउँपालिकामा लगाइएको प्रतिबन्धित गाँजा शनिबार खेती नष्ट गरेको हो । 

एसपी रमेश थापाका अनुसार ताप्ली गाउँपालिकाका विभिन्न वडाका १ सय ५ रोपनी जग्गामा लगाएको १ लाख १३ हजार गाँजा खेती फडानी गरेर नष्ट गरिएको छ । बेलका नगरपालिका–७ मैनामैनीको विभिन्न स्थानमा ६ कठ्ठा जग्गामा लगाइएको गाँजाको बोट इलाका प्रहरी कार्यालय रामपुर ठोक्सिला र अस्थायी प्रहरी पोष्ट कोठुबाट खटिएको प्रहरी टोलीले नष्ट गरेको छ ।

कानुनले गाँजालाई लागू औषधको सूचीमा राखेर यसको खेती? ओसारपसार, खरिदबिक्री तथा सेवन गर्न बन्देज लगाएको छ । तर सरकारले चालु आवमा ल्याएको बजेट भाषणमा भने गाँजा खेतीका लागि संभाव्य अध्ययनका लागि भन्दै बजेट समेत विनियोजित गरेको अवस्था छ । तर, कतिपय सांसदहरुले संसद बैठकमा गाँजा खेतीका लागि कानून बनाउनुपर्ने धारणा राख्दै आइरहेका छन् ।