ओलीलाई धन्यवाद दिन बालकोट पुगे मुख्यमन्त्री कार्की

२८ आसोज, विराटनगर । कोशी प्रदेशका मुख्यमन्त्री केदार कार्की बालकोट पुगेर एमाले अध्यक्ष केपी शर्मा ओलीसँग भेटवार्ता गरेका छन् । कांग्रेसबाट विद्रोह गर्दै एमालेको समर्थनमा मुख्यमन्त्री नियुक्त भएका कार्की आइतबार बिहान ओली  निवास बालकोट पुगेका हुन् ।  

आइतबार बिहान भक्तपुरको बालकोटस्थित निवासमै पुगेर उनले ओलीसित भेट गरेका थिए । भेटमा राजनीतिक विश्लेषक पुरञ्जन आचार्य पनि सहभागी थिए । उनले आचार्यलाई साथ लिएर गएका थिए । त्यस क्रममा कार्कीले सहयोगका लागि ओलीलाई धन्यवाद दिए । राम्रो काम गर्न ओलीले कार्कीलाई आग्रह गरेको आचार्यले जानकारी दिए ।

आचार्यले भने, ‘हामी जामका कारण ढिला गरी बालकोट पुग्यौँ । ओलीजीलाई निस्कन हतार भएकाले लामो कुराकानी भएन । केदारजीले सहयोगका लागि धन्यवाद दिनुभयो, ओलीजीले यो राजनीति हो, राम्रो काम गर्नू भन्नुभयो ।’

सत्ता गठबन्धनको निर्णयलाई चुनौती दिँदै नेपाली कांग्रेसका नेता शेखर कोइराला पक्षीय आठ र एमालेका ३९ प्रदेशसभा सदस्यको समर्थनमा उनी मुख्यमन्त्री बनेका हुन् । मुख्यमन्त्री कार्कीले शनिबार नेता कोइरालासित भेटवार्ता गरेका थिए । प्रधानमन्त्रीसँग पनि कार्कीले समय मागेको बताइएको छ ।