काेशी प्रदेशमा सहमतिकै सरकार बन्छ : मुख्यमन्त्री कार्की

२८ असोज, काठमाडौं । कोशी प्रदेशका नवनियुक्त मुख्यमन्त्री केदार कार्कीले प्रदेशमा सहमतिको सरकार बन्ने बताएका छन् । आइतबार प्रदेश प्रमुख परशुराम खापुङसमक्ष पद तथा गोपनीयताको शपथ लिएपछि संचारकर्मीहरुसँग संक्षिपत प्रतिक्रिया दिँदै उनले प्रदेशमा सहमतिको सरकार बन्ने बताएका हुन् ।

उनले यही सरकार बनेपछि प्रदेशको राजनीतिक संकट समाधान भएको दाबी गरे । प्रदेशसभा विघटन भएर मध्यावधि जान्छ कि भन्ने आशंक मेटिएको समेत बताए । प्रदेशमा देखिएका सामाजिक, साँस्कृतिक विवाद वार्ताद्वारा समस्या समाधान गर्ने उनको भनाइ थियो । 

उनले प्रदेशको नयाँ राजनीतिक कोर्षले राजनीतिक संकट टारेको बताउँदै पहिचान लगायत सबैखाले संकट समाधान हुने बताए । कांग्रेसका २९ मध्ये ८ र एमालेको ३९ प्रदेशसभा सदस्यकाे समर्थन  शनिबार मुख्यमन्त्री बनेको उनले आजै मात्र एमालेका रामबहादुर राना र कांग्रेस शमसेर राईलाई मन्त्री नियुक्त गरेका छन् । 

राई कांग्रेसका विद्राेही प्रदेश सांसद हुन् । कुराकानीका क्रममा उनले गठबन्धनलाई पनि समेटेर सरकार बनाउने संकेत गरेका छन् ।