कोशीका मुख्यमन्त्री कार्कीले बुधबार विश्वासको मत लिने

२९ असोज काठमाडौं । मुख्यमन्त्री केदार कार्कीले बुधबार विश्वासको मत लिने भएका छन् । यस प्रयोजनका लागि बुधबार कोशी प्रदेशसभा बैठक बोलाइएको छ । प्रदेशसभा सचिवालयका सचिव गोपालप्रसाद पराजुलीले एक सूचना जारी गर्दै प्रदेशसभाको बैठक १ गते बुधबार बिहान ११ बजे बस्ने गरी बोलाइएको जानकारी दिएका छन् । 

उक्त बैठक चौथो अधिवेशनको तेस्रो हुने सूचनामा जनाइएको छ । प्रदेशसभाको बैठक यही असोज २० मा स्थगित भएको थियो । उक्त बैठकका कार्यसूची भने सार्वजनिक भइसकेको छैन । तर बैठक बस्नेबारे सूचनामार्फत प्रदेशसभा सदस्यहरूलाइ जानकारी दिइएकाे छ ।

बैठकमा एमालेको समर्थनमा कांग्रेसका तर्फबाट मुख्यमन्त्री बनेका केदार कार्कीले विश्वासको मत लिने कार्यसूची तय संभावना रहेको बताइएको छ । कार्की यही असोज २५ गते एमालेका ३९ र कांग्रेसका ८ गरी ४७ जना प्रदेशसभा सदस्यको समर्थनमा मुख्यमन्त्री नियुक्त भएका थिए । उनले नियुक्ति भएको ३० दिनभित्र प्रदेशसभाबाट विश्वासको मत लिनुपर्ने संवैधानिक व्यवस्था छ ।