युवतीमाथि सामूहिक बलात्कारको आरोपमा ट्रक चालकसहित ३ जना पक्राउ

२९ असोज, काठमाडौं । मोरङ सदरमुकाम विराटनगरमा २५ वर्षीया युवतीमाथि सामूहिक बलात्कार भएको छ । बलात्कारको आरोपमा प्रहरीले एक नाबालकसहित ३ जनालाई पक्राउ गरेको छ । पक्राउ परेका आरोपीहरु यातायात मजदुर रहेको बुझिएको छ । 

पीडित युवतीको उजुरीका आधारमा उनीहरुलाई पक्राउ गरिएको प्रहरीको दाबी छ । मोरङ प्रहरीका अनुसार पक्राउ पर्नेहरुमा धनुषाको मिथिला विहारी नगरपालिका–११ का ४३ वर्षीय टेकबहादुर तामाङ, २० वर्षीय विनोद चौहान र सिन्धुली घर भएका १६ वर्षीय बालक रहेका छन् । तामाङ प्रदेश २४-००१ ख ००२१ नम्बरको ट्रकका चालक र चौहान सहचालक हुन् । आरोपी बालक अर्को ट्रकका सहचालक हुन् ।

उनीहरुले विराटनगर महानगरपालिका–३ मा सफारीमा यात्रामा रहेकी युवतीलाई जबर्जस्ती तानेर पार्किङ गरिराखेको ट्रकमा पुर्याएर पालैपालो बलात्कार गरेको आरोप छ । उनीहरुमाथि जिल्ला अदालतबाट म्याद लिइ आवश्यक अनुसन्धान भइरहेको प्रहरीले जनाएको छ ।