इजरायलमा मृत्यु भएका नेपालीको शव चाँडो ल्याउन सरकारको ध्यानाकर्षण

 

३० असाेज, काठमाडौं । प्रतिनिधिसभा अन्तर्गतकाे शिक्षा स्वास्थ्य तथा सूचना प्रविधि समितिका सभापति भानुभक्त जोशीले इजरायलमा मृत्यु भएका नेपालीहरूको शव नेपाल ल्याउनुकाे लागि सरकारको ध्यानाकर्षण गराउने निर्णय गरेका छन् । 

आज समितिको बैठकमा उनले उनीहरुलाई आवश्यक राहत दिने, बाँकी नेपालीलाई नेपाल फिर्ता ल्याउने र बझाङमा गएको भूकम्पप्रति ध्यानाकर्षण गराउने निर्णय पनि भएको जनाए ।

उनले भने, ‘इजरायलमा मृत्यु भएका १० जना नेपालीको शव चाँडो भन्दा चाँडो नेपाल ल्याउनका लागि सरकारलाई ध्यानाकर्षण गराउने र परिवारलाई राहत दिने र त्यहाँ रहेका नेपालीहरू नेपाल छिटो फर्किन चाहन्छन् । उनीहरुलाई फर्काउन सरकारको ध्यानाकर्षण गराउने र बझाङ्मा गएको भुकम्पप्रति ध्यानाकर्षण गराउन निर्णय भएको छ ।’

यस्तै, उनले आन्दोलनरत बीबीएसका विद्यार्थीहरूको बारेमा सचिवालयले केही गृहकार्य गर्नुपर्ने भन्दै यसका लागि एउटा अध्ययन कार्यदल बनाएर विषयको अध्ययन पनि गर्नुपर्ने बताए । 

उनले भने, ‘डाक्टरमाथि हात उठाउन कोही कसरी बाध्य भयो, यसमा प्रशासनको गल्ती छ कि, यो बारेमा अध्ययन गर्नुपर्छ । समस्या कहाँ बाट सुरु भयो त्यसको पनि अध्ययन गर्नुपर्छ । यस्ता घटनाहरू भएपछि डाक्टरहरूले देशव्यापी रुपमा ४–५ दिन सेवा बन्द गर्ने हो भने त्यसको असर कस्तो पर्छ होला ? यसमा एउटा एजेण्डा नै बनाएर छलफल गरेर अध्ययन कार्यदल बनाएर अगाडि बढ्नु पर्छ । त्यो अध्ययन कार्यदलले घटना कहाँ बाट सुरु भयो र किन भयो भन्ने विषयको अध्ययन पनि गर्नुपर्छ ।’

युवा र खेलकुद क्षेत्रमा पछिल्लो समय प्रगति भए पनि सरकारको तर्फबाट र बजेटको हिसाबमा ओझेलमा परेको भन्दै यसमा सबैको धारणा समेटेर कार्य योजना बनाउन पर्ने उनको भनाई छ । त्यस्तै, समिति सदस्य सुमना श्रेष्ठले आन्दोलित विद्यार्थीहरूको कुरा उठाउँदै विद्यार्थीहरूको समस्याको दिगो समाधानका लागि एउटा कार्यदल बनाएर स्वास्थ्य, गृह र शिक्षा मन्त्रालयलाई निर्देशन दिनुपर्ने सुझाव दिएकी छन् । 

उनले भनिन्, ‘यहाँ बोलाएर छलफल त गरेका थियौ तर त्यसको दिगो व्यवस्थापन हुन सकेको छैन । त्यसका लागि पनि एउटा कार्यदल बनाएर स्वास्थ्य, गृह र शिक्षा मन्त्रालयलाई निर्देशन दिने हो कि, त्यसको दिगो समाधानको लागि हामीले नै पहल गर्नुपर्छ ।’