पाँच नेपालीको शव पहिचान गर्न डीएनए परिक्षण गरिँदै

१० कात्तिक, काठमाडौं । परराष्ट्र मन्त्रालयले इजरायलमा विद्रोही समूह हमासको आक्रमणमा परी ज्यान गुमाएका पाँच नेपालीको शव पहिचानका लागि डीएनए परिक्षण गर्न लागिएको जनाएको छ । शव पहिचानका लागि उनीहरुको आमा बाबुको डीएनए इजरायल पठाइएको मन्त्रालयले जनाएको छ । 

हमासको आक्रमणमा परी इजरायलमा निधन भएका १० जना नेपालीमध्ये पाँच जनाको शव नेपाल आइसकेको छ । पाँच जनाको शव पहिचान हुन नसक्दा नेपाल पठाउन समस्या भएपछि शव पहिचान गर्न डीएनए पठाइएको हो । उनीहरुका आमा बाबुको डीएनए स्वाब इजरायलमा परिक्षण हुनेछ । यस्पछि शव पहिचान गरी उनीहरुको शव नेपाल ल्याइने परराष्ट्र मन्त्रालयले जनाएको छ । 

उक्त आक्रमणमा परेर निधन भएका धनुषा सापही–६ का आनन्द साह, सुनसरी मधुवन–१ का राजेशकुमार स्वर्णकार, डोटी पचनाली–३ का राजन फुलारा, डोटी लामीखाल–८ का पदम थापा र सल्यान सारदा–३ का प्रवेश भण्डारीको शव पहिचान हुन सकिरहेको छैन । आक्रमणमा परी बेपत्ता रहेका कञ्चनपुरका विपिन जोशीका आमा बाबुको पनि डीएनए स्वाब संकलन गरी पठाइएको बताइएको छ । बेपत्ता रहेका जोशीको अवस्था अहिलेसम्म अज्ञात छ ।

आक्रमणमा परी मारिएको १० जना नेपाली विद्यार्थीमध्ये बझाङ जयपृथ्वी–६ का गणेशकुमार नेपाली, दार्चुला मालिकार्जन–४ का लोकेन्द्रसिंह धामी, दार्चुला लेकम–५ का दीपेशराज विष्ट, कैलाली घोडाघोडी–४ का नारायणप्रसाद न्यौपाने र कैलाली बौनियाँ–३ का आशिष चौधरीको शव स्वदेश ल्याइसकिएको छ ।