प्रतिनिधिसभाबाट केही विधेयकहरु समितिमा पठाइँदै

१६ कात्तिक, काठमाडौं । प्रतिनिधिसभाको बैठक आज बस्दैछ । आजको बैठक यो अधिवेशनको अन्तिम बैठक हो ।  संसदमा पेस भएका केही विधेयकहरुलाई समितिमा पठाएर संघीय संसदको जारी अधिवेशन आजदेखि अन्त्य गर्ने तयारीमा सरकार छ । 

बिहीबार बिहान बसेको मन्त्रिपरिषद बैठकले संसद अधिवेशन अन्त्य गर्न राष्ट्रपति समक्ष सिफारिस गर्नेछ । बुधबार बसेको कानुन, न्याय तथा संसदीय मामिला मन्त्रालयले कार्य व्यवस्था समितिको बुधबार बसेको बैठकमा अनौपचारिक रुपमा संसद अधिवेशन अन्त्यको बारेमा जानकारी गराएको थियो । 

संघीय संसदको अधिवेशन अन्त्य हुनुअघि सांसदहरूको १० दिनभन्दा बढी समयको बिदा स्वीकृत गर्ने, सांसदहरूले सोधेका प्रश्न टेबल गर्ने कार्यसूची रहन्छ । यी विषय पनि आजको लागि तोकिएको संसद बैठकको सम्भावित कार्यसूचीमा परेका छन् ।