केएमसीले भुकम्पबाट घाइतेको निःशुल्क उपचार गर्ने, प्रभावित क्षेत्रमा औषधिसहितको स्वास्थ्यकर्मी टीम पठाउने

१८ कात्तिक, काठमाडौं । काठमाडौं मेडिकल कलेज (केएमसी) ले जाजरकोटको भुकम्पमा परेर घाइते भएका व्यक्तिहरूको निःशुल्क उपचार गर्ने भएको छ ।

केएमसीका सल्लाहकार तथा मोरङ ३ बाट निर्वाचित प्रतिनिधि सभा सदस्य सुनील शर्माको सक्रियतामा भूकम्प पीडितको निःशुल्क उपचार गराउने निर्णय भएको अस्पतालकी कार्यकारी अध्यक्ष सोईना शर्माले प्रेस विज्ञप्ति मार्फत आज जानकारी दिएकी हुन् । त्यसै गरी स्वास्थ्य मन्त्रालयसँग समन्वय गरेर भूकम्प प्रभावित क्षेत्रमा स्वास्थ्य सामग्रीसहित स्वास्थ्यकर्मी समेत पठाउने केएमसीले जनाएको छ ।

अस्पतालमा उपचारका लागि आउने बिरामीलाई सहजीकरण गर्न प्रेस संयोजक नारायण दाहाल फोन नम्बर ९८०२३३५११९ र केएमसी रेस्पोन्स टीम फोन नम्बर ९८०२३३५११३ लाई सम्पर्क गर्न सूचित पनि गरिएको छ । भुकम्पमा ज्यान गुमाएका सबैप्रति श्रद्धाञ्जली अर्पण गर्दै सांसद शर्माले प्रभावित परिवारमा समवेदना प्रकट गरेका छन् ।