नेक हल्ट प्राइजको नयाँ संस्करणमा जुनसुकै विषयमा प्रस्तुति दिन पाइने

१८ कार्तिक, काठमाडौं । नेपाल इन्जिनियरिङ कलेज 'नेक'ले प्रसिद्ध हल्ट प्राइजको नयाँ संस्करणको तयारी गरेको छ । नेक हल्ट प्राइज अन्तरगत समि सुवेदीले नयाँ कमिटीलाई कार्यभार दिएसँगै नेक हल्ट प्राइजलाई यो पटक फरक रुपमा सञ्चालन गर्ने तयारी छ ।

नेक हल्ट प्राइज क्याम्पस निर्देशक सुवास खनालले तिहार तथा छठ पर्वको समाप्ति पछि नेक हल्ट प्राइजको नयाँ संस्करण सुरु गरिने बताए । यो पटकको प्रतियोगितामा सहभागी विद्यार्थीहरुले कुनैपनि विषयमा आफ्नो प्रस्तुतिहरु दिन पाउने भएकाले विगतको भन्दा फरक हुने बताए ।

‘विगतमा निश्चित शिर्षक र क्षेत्रहरु राखिन्थ्यो । यस पटकदेखि अधिकतम विद्यार्थीको सहभागितासँगै धेरै भन्दा धेरै नविनतम सोच र आइडियाहरु आवोस् भनेर कुनै शर्तहरु राखेका छैनौं । सहभागीहरूले आफुसँग भएका कुनैपनि नविनतम सोच, आइडिया र अनुसन्धानलाई प्रस्तुत गर्न पाउनुहुन्छ ।’ हल्ट प्राइज क्याम्पस निर्देशक खनालले भने ।

हल्ट प्राइज प्रसिद्ध अमेरिकी हल्ट फाउण्डेशनबाट हरेक वर्ष गरिने विश्वब्यापी कार्यक्रम हो । यसले इन्जिनियरिङ विधामा नविनतम सोच, विचार र अनुसन्धान गर्ने विद्यार्थीहरूलाई अन्तराष्ट्रिय एक्सपोज दिने गर्दछ । प्रत्येक वर्ष हुने प्रतियोगितामा विश्वभरका कलेजका विद्यार्थीहरुले सहभागीता जनाउने गरेका छन् । नेपालमा नेकसँगै पुल्चोक क्याम्पस, काठमाडौं युनिभर्सिटी, पोखरा युनिभर्सिटीमा नियमित रुपमा हल्ट प्राइज हुने गर्दछ । नेकमा हुने कार्यक्रममा मात्रै कलेजका एक सय बढी विद्यार्थीको सहभागिता हुन सक्ने अपेक्षा गरिएको छ ।

हल्ट प्राइजले विश्व भरका विद्यार्थीहरूलाई विश्वव्यापी समस्याहरूमा नविनतम सोध, अनुसन्धानहरू गर्न प्रेरित गर्छ । सन् २००९ मा एक मिलियन डलर सहितको स्टार्टअप कार्यक्रमको रूपमा स्थापित, हल्ट प्राइजले एक मिलियन भन्दा बढी विद्यार्थीहरूलाई विभिन्न सोध, अनुसन्धान र अध्ययनमा तालिम दिएको छ भने, एक सय भन्दाबढी सामाजिक उद्यमहरूलाई अगाडी बढाउन सहयोग गरेको छ ।

नेकमा यो वर्ष हुन गइरहेको प्रतियोगितामा विद्यार्थीहरूलाई दिगो विकास लक्ष्यहरूसँग मिल्दोजुल्दो र समाजमा सकारात्मक प्रभाव पार्ने विषयहरूलाई प्रस्तुत गर्न भनिएको छ । कार्यक्रमले कलेजमा अध्ययनरत विद्यार्थीहरूलाई सामाजिक आविष्कारक बन्न प्रेरित गर्ने तथा अन्तराष्ट्रिय रुपमा एक्सपोज हुने अवसर प्रदान गर्ने अपेक्षा गरिएको छ ।

हल्ट प्राइज नेक क्याम्पस निर्देशक खनालका अनुसार पहिले कलेज स्तरीय प्रतियोगीताका विजेताले भारतको मुम्बईमा हुने एसिया रिजनल प्रतियोगितामा भाग लिने र त्यहाँ उत्कृष्ट भए ग्लोबल प्रतिस्पर्धामा भाग लिन पाउने छन् । ग्लोवल प्रतिस्पर्धामा उत्कृष्ट हुनेले एक मिलियन डलर बराबरको पुरस्कार प्राप्त गर्नसक्नेछन् ।

नेकमा हुने प्रतिस्पर्धामा उत्कृष्ट हुने विद्यार्थीहरूलाई आकर्षक पुरस्कारहरू दिइने छ । हल्ट प्राइजको लक्ष्य विद्यार्थीले अध्ययन गर्दा सिकेको ज्ञान र सीपलाई प्रस्फुटन गर्ने माध्यम सृजना गर्दै उनीहरूलाई अन्तराष्ट्रिय तहमा पुर्याउनु रहेकोले पुरस्कार के कस्तो भन्दापनि प्रतियोगीतामा भाग लिँदा विद्यार्थीहरूले पाउने एक्सपोज ठूलो रहेको नेक हल्ट प्राइज संयोजक खनालको भनाई छ ।

मुनाफारहित सामाजिक शैक्षिक संस्थाका रूपमा जिल्ला प्रशासन कार्यालय भक्तपुरमा दर्ता भई सञ्चालित नेपाल इन्जिनियरिङ कलेजले विद्यार्थीमा रहेको प्रतिभालाई राष्ट्रिय तथा अन्तराष्ट्रिय रूपमा उजागर गर्न विभिन्न कार्यक्रम गर्ने गर्दछ । इन्जिनियरिङ विधामा स्नातक, स्नातकोत्तर कार्यक्रम सञ्चालन गर्दै आएको कलेजमा करिब २२ सयको हाराहारीमा विद्यार्थीहरू अध्ययनरत छन् ।