बचतकर्ताको रकम हिनामिना गर्ने सूर्यदर्शन सहकारीसँग किन जोडिए लामिछाने

७ पुष, काठमाडौं । । राष्ट्रिय स्वतन्त्र पार्टी (रास्वपा) का सभापति रवि लामिछाने बचतकर्ताको रकम हिनामिना गर्ने सुर्यदर्शन सहकारीसँग जोडिन पुगेका छन् । शनिबार पोखरा अमरसिंह चोकमा आयोजित सभामा लामिछानेमाथि खोया प्रहार भएको थियो ।  उनीमाथि खोया प्रहार भएपछि सहकारीसँग उनको सम्बन्ध चर्चामा आएको हो । 

लमजुङ घर भई पोखरा बस्दै आएका सन्तोष रानाभाटले खोया प्रहार गरेको घटनाले लामिछाने सहकारी प्रकरणमा जोडिन पुगेका छन् । सभापति लामिछानेले सहकारीको कुरा गरेपछि आक्रोशित बनेका रानाभाटले खोया प्रहार गरेका थिए । उनी सूर्यदर्शन सहकारीका बचत कर्ता हुन् ।

रानाभाटलाई वडा प्रहरी कार्यालय रामबजारको प्रहरी टोलीले पक्राउ गरेको छ । कार्यालयका इन्स्पेक्टर विनोद श्रेष्ठका अनुसार रानाभाटलाई पक्राउ गरिएको र थप अनुसन्धानको लागि जिल्ला प्रहरी कार्यालयमा राखिएको छ ।

सूर्यदर्शन सहकारीका सञ्चालक जितेन्द्र (जेबी) राई हुन् । सो सहकारीका बचतकर्ताको रकम हिनामिना गरेको आरोप लागेपछि राई फरार छन् । राईले उक्त सहकारीबाट ऋण लिएर ग्यालेक्सी फोर के टेलिभिजन खोलेका थिए । ग्यालेक्सीमा उक्त सहकारीबाट लामिछानेले समेत ऋण लिएर संस्थापक शेयर लगानी गरेको फेला परेको थियो ।

खोया हान्ने रानाभाटले लामिछानेले समेत सहकारीको पैसा दुरुपयोग गरेको आरोप लगाएका छन् । यसैबीच लामिछानेले नियोजितरूपमा आफ्नोविरूद्ध प्रचारवाजी गरिएको भन्दै आक्रोश व्यक्त गरेका छन् । उनले सामाजिक सञ्जालमा स्टाटस लेख्दै कान्तिपुरमा प्रकाशित समाचारप्रति कडा प्रतिक्रिया जनाएका छन् । खोया प्रहार गर्नु अगाडि नै समाचार रेडी रहेको उनको दाबी छ ।

ग्यालेक्सी टिभीसँग आफ्नो हिसाबकिताब पहिल्यै क्लियर गरिसकेको पनि रविले बताएका छन् । सूर्य दर्शन सहकारीबाट एक करोड लिएको फर्जी कागज बनाएर आफूलाई फसाउन खोजिएको उनको गुनासो छ ।