हेटौडामा सातै प्रदेशका मुख्यमन्त्रीहरूको संयुक्त बैठक

१२ पुस, काठमाडौं । प्रदेशका माग पुरा गराउन संघीय सरकारलाई दवाव दिनका लागि बाग्मती प्रदेशको राजधानी हेटौडामा मुख्यमन्त्रीहरू भेला भएका छन् । उनीहरूको बैठक सुरु हुन लागेको छ । बैठकमा सहभागी हुन सातै प्रदेशका मुख्यमन्त्रीहरू हेटौडा पुगिसकका छन् । 

बैठकमा मुख्यमन्त्रीसहित प्रदेशका मन्त्रीहरूको पनि सहभागिता रहनेछ । खासमा संघीय सरकारलाई दवाव दिनका लागि मुख्यमन्त्रीहरूले बैठक बोलाएका हुन् । संघले अधिकार नदिएको र कानुन पनि नबनाएको भन्दै प्रदेश सरकारले संघीय सरकारको विरोध गर्दै आएको छ ।  

संविधान बमोजिम संघले अधिकार नदिएको र असहयोग गरेको भन्दै सातै प्रदेश सरकारका मुख्यमन्त्रीहरूले संघीय सरकारलाई दवाव दिने निर्णय गरेका थिए । एक महिना अगाडी देखिनै हेटौडा बैठकको तयारी भएको थियो । यसअघि गत असारमा पोखरामा बैठक बसेर मुख्यमन्त्रीहरूले प्रदेशलाई प्रत्यायोजन  गर्नुपर्ने सम्पूर्ण अधिकार छ महिनाभित्र प्रत्यायोजन  गरिसक्न माग गरेका थिए ।