हेटौडाको भेला सकेर मुख्यमन्त्रीहरु प्रधानमन्त्री भेट्न काठमाडौं आउने

१३ पुस, काठमाडौं । हेटौडाको भेला सकाएर मुख्यमन्त्रीहरु प्रधानमन्त्री पुष्पकमल दाहाल प्रचण्डसँग प्रदेशका मुद्दाबारे भएको निर्णय सुनाउन काठमाडौं आउने भएका छन् । उनीहरू आज नै काठमाडौं आउँदैछन् । सातै प्रदेशका मुख्यमन्त्रीहरूले शनिबार प्रधानमन्त्री प्रचण्डसँग भेटवार्ता गर्ने सहमति गरेका छन् । 

हेटौंडामा शुक्रबार भएको ‘अन्तर प्रदेश मुख्यमन्त्री बैठक ले प्रधानमन्त्रीसँग भेटेर छलफल गर्ने निर्णय गरेको हो । बैठकमा शनिबार बिहान ८ बजे प्रधानमन्त्री प्रचण्डसँग भेटघाट गर्ने र आफ्ना माग राख्ने विषयमा छलफल भएको छ । बैठकपछि सबै मुख्यमन्त्रीहरू शुक्रबारै काठमाडौँ प्रस्थान गर्ने जनाइएको छ ।
 
केन्द्र सरकारले आवश्यक कानुन बनाएर अधिकार हस्तान्तरण नगरेको भन्दै सातै प्रदेशका मुख्यमन्त्रीहरू हेटौँडामा भेला भएका हुन् । बिहीबारबाट सुरु भएको भेलामा प्रदेश र स्थानीय तहका विज्ञहरू समेत सहभागी थिए । 
 
संघीयता कार्यान्वयनमा आएको लामो समय भइसक्दा पनि महत्त्वपूर्ण कानुन नबन्दा प्रदेश सरकार अधिकार सम्पन्न हुन नसकेको मुख्यमन्त्रीहरूको गुनासो छ । यसअघि उनीहरूले संविधानले दिएको अधिकार अनुसार कानुन निर्माण गर्न र अधिकार प्रत्यायोजन गर्न माग गर्दै प्रधानमन्त्रीलाई भेटेर दबाब दिएका थिए ।

कानुन अभावमा कर्मचारी, प्रहरी, शिक्षालगायतका क्षेत्रका काम प्रभावित भएको मुख्यमन्त्रीहरूको गुनासो छ । यसअघि सातै प्रदेशका मुख्यमन्त्रीहरूले गत असारमा पोखरामा भेला गर्दै ६ महिनाभित्र अधिकार दिन माग गरेका थिए ।