नेपाल एयरलाइन्सले सोमबार अलपत्र पारेका १५० यात्रुलाई आज पठायो बैंकक

२४ पुस, काठमाडौं । सोमबार बैंकक जान नेपाल एयरलाइन्सको टिकट काटेर एयरपोर्ट पुगेका तर, जहाज विग्रीएका कारण एयरपोर्टमै अलपत्र परेका १५० यात्रुलाई आज बैंकक पठाइएको छ । नेपाल एयरलाइन्सले केहिबेर अघि उनीहरुलाई बैंकक पठाइएको जनाएको छ । 

नेपाल एयरलाइन्सको काठमाडौँ–बैंकक उडानका क्रममा रहेको जहाजमा प्राविधिक समस्या देखिएपछि रोकिएका यात्रुहरूलाई आज अर्को जहाजमार्फत बैंकक पठाइएको हो । निगमको वाइडबडी ३३०, ९ एन–एएलजेट जहाजमार्फत सोमबार रोकिएका १५० जना यात्रु बैंकक पठाएको नेपाल वायुसेवा निगमका प्रवक्ता रमेश पौडेलले बताएका छन् । 
 
मंगलबार बिहान ११ः३० बजे उडान सेडूल रहेको जहाजका लागि यात्रुहरूको बोर्डिङ पास लिएर छिरिसकेका छन् । सोमबार दिउँसो काठमाडौँ–बैंककका लागि उड्न लागेको निगमको आरए, ९ ए–एकेडब्लू जहाजमा हाइड्रोलिकमा समस्या देखिएपछि ग्राउन्डेड बन्न पुगेको थियो । तत्काल जहाजको समस्या समाधान नहुँदा र विकल्पका अर्को जहाजको समेत व्यवस्था नहुँदा १५० जना यात्रु काठमाडौँमा नै रोकिन पुगेका थिए । 

निगमले उक्त यात्रुहरूलाई होटलमा व्यवस्था गरेको थियो । रोकिएका यात्रुहरूलाई आज अर्को जहाजमार्फत निगमले बैंकक पठाएको हो । प्राविधिक समस्या देखिएको निगमको न्यारोबडी ३२० आरए, ९ए–एकेडब्ल जहाज बेलुका नै निगमका प्राविधिक टोलीले मर्मत गरी १२ः३० बजे मलेसियाको क्वालालाम्पुर उडेको प्रवक्ता पौडेलले जानकारी दिए । 

काठमाडौँ–बैंकक उडानका क्रममा जहाजमा सामान्य प्राविधिक समस्या देखिदा उड्न सकेन । तत्काल प्राविधिक टोली खटाएर मर्मत पश्चात् जहाजको समस्या हिजो नै हल भएको थियो । सोही जहाज राति १२ः३० बजे १५१ यात्रु लिएर क्वालालम्पुर उडेको थियो ।