बाँसबारी छाला जुत्ता कारखानाको जग्गा हडपेको आरोपमा व्यवसायी अरुण चौधरी र कार्यकारी प्रमुख थापा पक्राउ

१८ माघ, काठमाडौं । उद्योगपति विनोद चौधरीका कान्छा भाई अरुण चौधरी पक्राउ परेका छन् । बिहीबार प्रहरीको केन्द्रीय अनुसन्धान ब्यूरो (सीआईबी) को टोलीले उनलाई काठमाडौंको लैनचौरबाट पक्राउ गरेको हो । उनीसँगै बासबारी छाला जुत्ता कारखानाका अध्यक्ष अजित नारायण सिंह थापा पनि पक्राउ परेका छन् । 

कारखानाको १० रोपनी जग्गा सीजी रेसिडेन्सी प्रालिको नाममा नामसारी भएको घटनामा अनुसन्धानका लागि उनलाई काठमाडौंको बत्तीसपुतलीबाट सीआईबीले पक्राउ गरेको हो ।

बाँसबारी छाला जुत्ता कारखानाको जग्गा सम्बन्धी विवादमा अनुसन्धानका लागि उनलाई पक्राउ गरेको सीआईबीले जनाएको छ । छालाजुत्ता कारखानाको १० रोपनी जग्गा सीजी रेसिडेन्सी प्रालिको नाममा नामसारी गर्दा उनले ठगी गरेको पाइएपछि अनुसन्धानका लागि पक्राउ गरेको सीआईबीको भनाइ छ ।
 
बाँसबारी छाला जुत्ता कारखानाको जग्गा हडपेको उजुरी सीआईबीमा परेको थियो । ब्युरोकी एआईजी किरण बज्राचार्यले जग्गा विवादबारे अनुसन्धान गर्न पक्राउ गरिएको जानकारी दिइन् । उनी प्रतिनिधिसभा सदस्य तथा अर्बपति व्यापारी विनोद चौधरीका भाइ हुन् ।
 
बाँसबारी छाला तथा जुत्ता कारखानाको १० रोपनी सरकारी जग्गा आफ्नो बनाएको आरोप उनीमाथि छ । वार्षिक १० लाख जुत्ता उत्पादन गर्ने सर्तमा तत्कालीन ‘च्याम्पियन फूटवेयर लिमिटेड’ खोलेको चौधरी समूहले केही वर्षपछि त्यो जग्गालाई आफ्नो निजी सम्पत्ति बनाएको सीआईबीको भनाइ छ ।