जग्गा हडपेको आरोपमा पक्राउ परेका चौधरी र थापालाई चिरायु अस्पतालबाट ग्राण्डीमा सारियो

१९ माघ, काठमाडौं ।  प्रहरीले सरकारी बाँसबारी छाला जुत्ता कारखानाको जग्गा हिनामिना गरेको आरोपमा पक्राउ परेका व्यवसायी अरुण चौधरी र छाला जुत्ता कारखानाका तत्कालीन सञ्चालक अजितमानसिंह थापालाई ग्राण्डी अस्पताल पुर्याएको छ । 

हिरासतमा अस्वस्थ भएपछि बिहीबार राती महाराजगञ्ज स्थित चिरायु अस्पतालमा उपचारका लागि लगिएको थियो । उनीहरूलाई थप उपचारका लागि शुक्रबार ग्राण्डी अस्पताल लगिएको सीआईबीले जनाएको छ । अस्पतालले रेफर गरेपछि ग्राण्डी अस्पतालमा उनीहरूलाई सारिएको सीआईबीको भनाइ छ । 

जिल्ला अदालत, काठमाडौंले उनीहरूलाई ४ दिन हिरासतमा राखेर अनुसन्धान गर्न अनुमति दिएको छ । अदालतबाट फर्काएर ल्याउँदा उनीहरूलाई केहीबेर हिरासतमा राखेर अस्पताल भर्ना गरिएको थियो ।

पक्राउ परेका मध्ये थापा ८२ वर्षका छन् । उनको मुटुको समस्या छ । चौधरीलाई पनि रक्तचापको समस्या भएको भन्दै अस्पताल भर्ना गरिएको हो । यही प्रकरणमा अपरान्ह सीजी चाँदबागका अध्यक्ष सञ्जय ठाकुरलाई पनि पक्राउ परेका छन् । उनलाई आज (शुक्रबार) अदालतमा हाजिर गराउने तयारी छ ।

पहिले बाँसबारी छाला जुत्ता कारखानाको नाममा रहेको १० रोपनी सरकारी जग्गा हाल चाँदबाग रिजेन्सी प्रालिको नाममा छ र त्यहाँ चाँदबाग स्कुल सञ्चालन भइरहेको छ । पक्राउ परेका चौधरी चाँदबाग रिजेन्सी प्रालिका सदस्य छन् ।