स्वीकृत भएन डीआईजी अर्जुन चन्दको राजीनामा

२२ माघ, काठमाडौं । त्रिभुवन अन्तर्राष्ट्रिय विमानस्थल सुरक्षा कार्यालयका प्रमुख डीआईजी अर्जुन चन्दको राजीनामा पत्र प्रहरी प्रधान कार्यालयले फिर्ता गरिदिएको छ । राजीनामाको रित नपुगेको भन्दै फिर्ता गरिदिएको प्रहरी प्रधान कार्यालयका उच्च अधिकारीले जानकारी दिए ।

डीआईजी चन्दको राजीनामा ‘रितपूर्ण’ नभएको भन्दै प्रहरी प्रधान कार्यालय, नक्सालले फिर्ता गरिदिएको हो । मानव स्रोत विभागमा पुगेको उनको राजीनामाको पत्र रितपूर्वक नभएकोले फिर्ता गरिदिएको एक उच्च प्रहरी अधिकृतले बताए । गएको शनिबार उनले राजीनामा दिएको विषय सार्वजनिक भएको थियो ।

घरायसी’ कारण देखाउँदै उनले राजीनामा दिएको पत्र आइतबार प्रहरी प्रधान कार्यालयको मानव स्रोत विभागमा पुगेको थियो । सोमबार प्रहरी महानिरीक्षक आईजीपी वसन्तबहादुर कुँवर, मानव स्रोत विभागका प्रमुख एआईजी टेकप्रसाद राईलगायतले उनीसँग छलफल गरेर राजीनामा नदिन सुझाएका थिए ।

यस्तै एक एआईजीले अहिले राजीनामा दिँदा डीआईजी चन्द र संगठनलाई पनि राम्रो नहुने भएकाले राजीनामा नदिन भनिएको छ । चन्दको बिदा भने स्वीकृत गरेको छ । विमानस्थलमा कर्मचारी र प्रहरीबीच भएको कुटपिट प्रकरणपछि डीआईजी चन्दले गएको शनिबार राजीनामा दिएका थिए । यद्यपि, उनले व्यक्तिगत कारणले राजीनामा दिएका बताएका थिए ।