चलायमान हुन थाले बागलुङका ‘होमस्टे’

६ फागुन, ढोरपाटन (बागलुङ) । पर्यटन याम सुरु भएसँगै बागलुङका घरवास (होम–स्टे) मा पर्यटक बढ्न थालेका छन् । दसैँ तिहारको समयमा भरिभराउ भएका घरवास जाडोयाम सुरु भएपछि पाहुना कम भएका थिए । माघ दोस्रो सातादेखि पुनः घरवासमा पर्यटक आउन थालेका हुन् । बागलुङमा आधिकारिक रुपमा दर्ता भएका २८ सामुदायिक तथा व्यक्तिगत घरवास छन् भने केही दर्ता विनानै सञ्चालनमा छन् । जिल्लाको बागलुङ नगरपालिका १० भुकण्डेमा सबैभन्दा बढी घरवास भएको पाइन्छ । 

भकुण्डेमा १५ वटा सामुदायिक घरवास रहेका छन् । काठेखोल, बरेङ, ढोरपाटन, लगायतका ठाउँमा पनि घरवास सञ्चालनमा छन् । पछिल्लो समय सबैभन्दा बढी चल्ने मध्येमा भकुण्डेस्थित अतिथि सत्कार सामुदायिक घरवास र काठेखोला गाउँपालिका–३ बेलढुङ्गामा रहेको बेलढुङ्गा सामुदायिक घरवास पर्छन् । भकुण्डेबाट पूर्वदेखि पश्चिमसम्म अनगिन्ती हिमशृृङ्खलाको अवलोकनसँगै उच्च पहाडी क्षेत्रको दृश्यावलोकन गर्न सकिने र बेलढुङ्गाबाट हिमालीसँगै पहाडी जिल्लाका धेरै ठाउँ देख्न सकिने हुँदा पर्यटक घुम्न आउने गर्छन् । 

पर्यटकीय क्षेत्र भएकै ठाउँमा घरवास सञ्चालनमा रहेको हुँदा पर्यटकलाई खान, बस्नको लागि सहज भएको छ भने स्थानीयवासीलाई आयआर्जनको माध्यम बनेको छ । बागलुङ नगरपालिका १० भकुण्डेका घरवास सञ्चालक याम थापाले आन्तरिकसँगै बाह्य पर्यटक आउन थालेको बताए । आन्तरिक पर्यटक एक दिन आउने र बास बसेर जाने गरेको भन्दै विदेशी पाहुना केही दिन बस्ने उनको भनाइ छ । 

भकुण्डेमा रहेको बराह ताल र भ्यूटावरमा चढेर रमाउनका लागि प्रत्येक साता दुई दिन पर्यटकको बढी चहलपहल हुने थापाले बताए । पर्यटक आउन थालेपछि घरवास संचालकहरुको आय आर्जनसमेत राम्रो बन्दै गएको उनी सुनाउँछन् । 

थापाका अनुसार महिनामा करिब पाँच सय पर्यटक घरवासमा बास बस्ने गरी आउने गरेका छन् । उनले भने, “अहिले पर्यटक आउन थालेका छन्, बर्खामा सुनसान जस्तै भएको थियो, दसैँ तिहारका बेला धेरै आए, जाडो भएर होला बीचमा निकै कम भएको थियो, विदेशी पर्यटक पनि आइरहेका छन्, अमेरिकन र कोरियन पर्यटक बढी आउँछन्, घरवासलाई व्यवस्थित बनाउँदै गएका छौँ, त्यसले गर्दा पनि मान्छेहरु एक रात भए पनि बस्नका लागि यहाँ आउनुहुन्छ, उहाँहरूलाई जति सक्दो सन्तुष्ट बनाएर पठाउने कोशिश गरिरहेका छौँ ।”

बेलढुङ्गा सामुदायिक घरवासका अध्यक्ष गोपाल श्रीसले घुम्न आउने पर्यटकको सङ्ख्या बढेपछि बास बस्न आउने पाहुना पनि विस्तारै बढ्न थालेको बताए । बाह्रैमहिना नियमित पर्यटक नआउँदा घरवास सञ्चालनमा समस्या भएको सुनाउँदै पर्यटकीय याम सुरु भएपछि घरवासमा सबै पाहुना आउने उनको भनाइ छ । घरवासलाई पाहुनाको चाहना र माग अनुसार व्यवस्थित बनाएको सुनाउँदै धेरै जस्तो पर्यटकले बजारको जस्तो सुविधा खोज्ने गरेको श्रीस बताउँछन् । 

बेलढुङ्गामा महिनामा झण्डै एक हजार पाँच सय पर्यटक आउने भए पनि कम मात्रै घरवासमा आउने उनको भनाइ छ । “घरवास सञ्चालनमा नआउँदा धेरै पर्यटकलाई समस्या थियो, घुम्दाघुम्दै रात पर्यो भने बजार फर्किन समस्या हुन्थ्यो, गाउँका गोठमा बास बस्नुपर्ने स्थिति थियो, तर अहिले पर्यटकको त्यो समस्यालाई हामीहरुले समाधान गरेका छौँ” अध्यक्ष श्रीसले भने– “बेला–बेला बाहिरबाट पनि पर्यटकहरू आउँछन्, अपेक्षा अनुसार पाहुना आउन सकेका छैनन् तर समग्रमा अहिले आइराखेको सङ्ख्या राम्रो हो, पर्यटकीय क्षेत्रलाई व्यवस्थित गर्न पनि लागिपरेका छौँ, पछिपछि धेरै आउने अपेक्षा राखेका छौँ ।”

अतिथि सत्कार घरवास भकुण्डेकी उपाध्यक्ष इन्द्रा थापा हरेक हप्ता शुक्रबार र शनिबार पाहुनाले घरवास भरिभराउ हुने बताए । अन्य समयमा पनि निरन्तर पर्यटक आइराखेको भन्दै यहाँका घरवास सञ्चालकले लगानीसमेत गरिरहेको उनको भनाइ छ । खासगरी बागलुङ बजारबाट धेरै पाहुना आउने हुँदा घरवास सञ्चालनमा समस्या नभएको थापा बताउँछन् । माघदेखि हालसम्म हजारौं पाहुनालाई सेवा दिएको उनले बताए । 

उपाध्यक्ष थापाले भने– “पाहुना आउन थालेपछि लगानी गरिरहेका छौँ, छुट्टै घर बनायौँ, अन्य व्यवस्थापन पनि गरिरहेका छौँ, धेरैले बजारको जस्तो सुविधा खोज्छन्, गाउँमा ठिकै खालको सुविधा छ, धेरैले नेट खोज्ने हुँदा नेटको पनि व्यवस्था मिलाएका छौँ, हामीहरुले स्थानीय उत्पादन कोदोको सेलरोटी, ढिँडो, सिन्कीको अचार, लोकल कुखुरा, कालो सुङ्गुरको मासु पाहुनालाई उपलब्ध गराउने गरेका छौँ, यहाँ ठूलो टिम आयो भने १५ वटा घरवास छन्, सबैलाई मिलाएर राख्छौँ, यहाँ आउने कोही पनि पाहुनाले बास नपाएर समस्यामा पर्ने अवस्था छैन ।”