मेलम्ची बजारका अनाधिकृत संरचना हटाउन सुरु
नेपालबहस संवाददाता
फागुन १३, २०८० आइतबार १५:३५:१६
१३ फागुन, सिन्धुपाल्चोक । मेलम्ची नगरपालिकाले वडा नं ११ बजार क्षेत्रमा सडक पेटी मिचेर बनाइएका संरचना तथा सामग्री हटाउन सुरु गरेको छ । नगरपालिकाले डोजर तथा जनशक्तिको सहायताले सडकपेटी मिचेर बनाइएका अवैध संरचना हटाउन सुरु गरेको हो ।
पैँतीस दिने सूचना जारी गरेर हटाउन भनिए पनि अटेर गरेर नहटाएपछि डोजर लगाएर हटाइएको नगरपालिकाका इञ्जिनियर जीतबहादुर कार्कीले जानकारी दिए । गत पुस २६ गते बसेको कार्यपालिका बैठकले बजारका अव्यवस्थित संरचना हटाउने निर्णय गरेको थियो ।
मेलम्ची बजारमा एक सय भन्दाबढी घरले सडकपेटी अतिक्रमण गरी संरचना बनाएपछि ती संरचना हटाउन नगरपालिकाले सूचना जारी गरेको नगर प्रमुख आइतमान तामाङले जानकारी दिए । नगरको आग्रहमा केहिले आफैँ हटाएका भन्दै बाँकी रहेका घरमा डोजर लगाइएको मेलम्ची–११ का वडाध्यक्ष चन्द्रबहादुर तामाङले बताए ।
बजारलाई व्यवस्थित बनाउनका लागि मेलम्ची–११ का वडाध्यक्ष तामाङको अध्यक्षतामा बजार व्यवस्थापन समिति बनाइएको थियो । सोही समितिको निर्णय अनुसार ३५ दिने सूचना नगरपालिकाले जारी गरेको थियो । उक्त सूचनाको म्याद नसकिँदै अधिकांश स्थानीय तथा व्यापारीले स्वतःस्फूर्त रूपमा अतिक्रमित अस्थायी संरचना हटाएका थिए ।
सूचनाको बेवास्ता गरी नहटाइएका एक दर्जनबढी संरचनामाथि नगरपालिकाले डोजर चलाएको इञ्जिनियर कार्कीले बताए । उनका अनुसार पालिकाले बजार व्यवस्थापनका लागि सञ्चालन गरेको अभियानप्रति यहाँका व्यवसायीले पूर्णसाथ दिएका छन् ।
अभियानमा मेलम्ची–१० का वडाध्यक्ष अमृत खनाल, ९ का वडाध्यक्ष किरणदिप खडका, स्थानीयलगायतको सहभागिता थियो । मेलम्ची बजार क्षेत्रको मात्र नभइ तालामाराङ, बाहुनेपाटी, दुवाचौर, भोटेचौरलगायत क्षेत्रको पनि उचित व्यवस्थापन हुनुपर्ने व्यवसायी रामकृष्ण चालिसेले बताए ।
नगरपालिकाको उक्त अभियानमा नगर उद्योग वाणिज्य सङ्घले पूर्ण समर्थन जनाएको सङ्घका महासचिव ताराबहादुर बानियाँले जानकारी दिए । संरचना भत्काउने मात्रै नभइ उचित व्यवस्थापन समेत गर्नुपर्ने उनको माग छ ।
अतिक्रमित संरचना हटाउँदा सडक फराकिलो हुनुका साथै बजार सुन्दर देखिएको स्थानीयले बताएका छन् । मेलम्ची क्षेत्रमा पार्किङको समस्या रहेको भन्दै यसको उचित व्यवस्थापन हुनुपर्ने स्थानीय विष्णुप्रसाद दुलालले बताए ।
यसैबीच, सिन्धुपाल्चोकको पाँचपोखरी थाङ्पाल गाउँपालिका र काभ्रेपलाञ्चोकको बनेपा नगरपालिकाबीच भगिनीसम्बन्ध स्थापना भएको छ । बनेपामा आयोजित कार्यक्रमकाबीच सम्झौता पत्रमा हस्ताक्षर गर्दै भगिनीसम्बन्ध सुरुवात गरिएको हो ।
उक्त कार्यक्रममा बनेपा नगरपालिकाका प्रमुख शान्तिरत्न शाक्यले पाँचपोखरिको विकासका लागि सहयोग गर्न सधैँ तयार रहेको बताए । पर्यटनको विकास तथा प्रवर्द्धन, अर्गानिक आलु तथा तरकारीको बजार व्यवस्थापनलगायत क्षेत्रमा नगरपालिकाको सधैँ सहयोग रहने उनले प्रतिबद्धता जनाए । शाक्यले पाँचपोखरीमा आँखा अस्पताल सञ्चालन गर्ने विषय सकारात्मक रहेको भन्दै दुवै पालिकाको हितका लागि सम्बन्ध स्थापना गरेको प्रष्ट पारे ।
पाँचपोखरी थाङ्पाल गाउँपालिकाका अध्यक्ष टाँसी लामाले गाउँपालिकालाई समृद्ध बनाउन यो सम्बन्ध उपलब्धिमुलक रहने बताए । काठमाडौँसँग जोडिएको जिल्ला भएर पनि पछि पाँचपोखरीलाई विकसित र समृद्ध बनाउनका लागि भगिनीसम्बन्ध स्थापना गरिएको उनको भनाइ छ ।
अध्यक्ष लामाले यो ऐतिहासिक निर्णय गाउँपालिकाको इतिहासमा लेखिएको बताए । उनले आगामी दिनमा साझेदारी गर्दै अगाडि बढ्ने प्रतिबद्धता जनाए । गाउँपालिकाका उपाध्यक्ष सुनिता अधिकारीले यो मैत्रीपूर्ण भ्रमणले धेरै कुराको सिकाएको बताए।
कार्यक्रममा बनेपा नगरपालिकाका प्रमुख प्रशासकीय अधिकृत भोलाप्रसाद चापागाईंले नगरपालिकामा भइरहेका मुख्यमुख्य कामका बारेमा जानकारी गराएको थियो ।
त्यस्तै, नगर उपप्रमुख विमला सापकोटाले दुई पालिकाका जनताबीच आपसी सहयोग तथा गहिरो भ्रातृत्वसम्बन्ध र समझदारीलाई प्रवद्र्धन एवं सम्बद्र्धन गर्ने उद्देश्यले भगिनीसम्बन्ध स्थापना गरिएको बताए ।
आज भएको सम्झौतामा, “दुई पालिकाबीचको सम्बन्ध, आपसी हितका सिद्धान्तअनुरूप दुई पालिकाका जनताबीच आर्थिक, व्यपारिक, सांस्कृतिक, प्राविधिक, पर्यावरणा संरक्षण, प्राकृतिक स्रोतको उपयोग र पर्यटन प्रवद्र्धनको क्षेत्रमा संयुक्त रूपमा मैत्रीपूर्ण आदानप्रदान र सहयोग गर्न स्वीकार गर्दछौँ”, भनिएको छ ।
सम्झौताको भावनालाई कार्यान्वयन गर्न आगामी दिनमा दुई पालिकाबीच विषयगत क्षेत्रका विशेष सम्झौतामार्फत अगाडि बढ्ने, सम्झौता कार्यान्वयनका क्रममा कुनै द्विविधा उपस्थित भएमा आपसी सहमतिमा समाधान गर्नेलगायत कुरा सम्झौता पत्रमा उल्लेख गरिएको छ । दुईवटै पालिकाका प्रमुख, उपप्रमुख, अध्यक्ष र उपाध्यक्षले हस्ताक्षर गरेको सम्झौतापत्र आजैदेखि लागू भएको जनाइएको छ ।
नेपालबहस संवाददाता
नेपालबहस डटकमको अंग्रेजी संस्करणका साथै अनलाइन टिभी पनि सञ्चालित छ । फेसबुक र ट्वीटरमार्फत पनि हामीसँग जोडिन सकिनेछ । नेपालबहसमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।
लेखकबाट थपबागमती प्रदेश सरकारद्वारा ३८ दशमलव ९२ प्रतिशत बजेट खर्च
बैशाख २७, २०८१ बिहिबार
सीप मेलामा डकर्मी तालिमका लागि आवेदन आह्वान
बैशाख २६, २०८१ बुधबार
मनै लोभ्याउने जाकाराण्डा फूल !
बैशाख २६, २०८१ बुधबार
गृृहमन्त्री रविको बचाउ प्रकरणले महान्यायाधिक्ता विवादमा
नेपालबहस संवाददाता
बैशाख २६, २०८१ बुधबार
सीमा नाकामा सशस्त्रका एसपीमाथि निगरानी, पर्साका एसपी हेडक्वार्टरमा तानिए
नेपालबहस संवाददाता
बैशाख २७, २०८१ बिहिबार
प्रचण्डको यूटर्नले जोगिएको रवि लामिछानेको पद
विनोद त्रिपाठी
बैशाख २७, २०८१ बिहिबार
सीमा नाकामा सशस्त्रका एसपीमाथि निगरानी, पर्साका एसपी हेडक्वार्टरमा तानिए
बैशाख २७, २०८१ बिहिबार
प्रचण्डको यूटर्नले जोगिएको रवि लामिछानेको पद
बैशाख २७, २०८१ बिहिबार
फेरि फुट्यो जसपा, लावतीको संयोजकत्वमा पहिचानवादी मोर्चा घोषणा
बैशाख २७, २०८१ बिहिबार
चालकको लापरबाहीका कारण गण्डकीमा बर्सेनि बढ्दै सवारी दुर्घटना
बैशाख २७, २०८१ बिहिबार
मारवाडी क्रिकेट लिगः वीरगञ्ज ब्लास्टर र लुम्बिनी लायन्स विजयी
बैशाख २७, २०८१ बिहिबार
दार्चुलामा चट्याङ लागेर एक बालिका घाइते, तीन पशु मरे
बैशाख २७, २०८१ बिहिबार
मधेश प्रदेशमा १० महिनामा आगलागीबाट १९ जनाको मृत्यु
बैशाख २७, २०८१ बिहिबार
मधेशमा सरकारबाट बाहिरिने तयारीमा एमाले र माओवादी
बैशाख २७, २०८१ बिहिबार
हर्क साम्पाङले सोधे धरानका पुर्व मेयर र उपमेयरलाई ९ बुँदे स्पष्टीकरण (पूर्णपाठ)
बैशाख २७, २०८१ बिहिबार