झापाको बाहुनडाँगीबाट पदयात्रा गर्दै उदयपुर आइपुगे मुख्यमन्त्री कार्की

१४ फागुन, सुनसरी । कोशी प्रदेशका मुख्यमन्त्री केदार कार्की २ सय किलोमिटर पैदल यात्रा गरी उदयपुर आइपुगेका छन् । चार जिल्लामा २०० किलोमिटर पदयात्रा गर्दै कार्की उदयपुर आइपुगेका हुन् । यही फागुन ९ गते झापाको बाहुन डाँगीबाट हातीको जैविक मार्गमा ‘हातीमैत्री पदयात्रा’ सुरु गरिएको थियो ।

यसक्रममा कार्कीले झापा, इलाम, मोरङ र सुनसरीका विभिन्न वनक्षेत्र तथा बस्तीमा अवस्थित हात्ती जैविकमार्ग हुँदै यात्रा गरे । पदयात्रा टोलीका प्रतिनिधि सोमबार सुनसरीको कोसी टप्पु क्षेत्र हुँदै उदयपुर पुगेका हुन् । टोली कोसी नदी तरेर भागलपुरतर्फ अघि बढेको छ ।

मुख्यमन्त्री कार्कीले आफू जनताका समस्या बुझ्न र समाधानका उपाय पहिल्याउन पदयात्रामा निस्किएको बताए । प्रदेशको आउँदो बजेटमा उचित कार्यक्रम समावेश गरी हात्ती प्रभावित क्षेत्रका निम्ति विशेष कार्यक्रम ल्याइने उनको भनाइ छ । उक्त पदयात्रा उदयपुरको बेलसोत पुगेर सकिनेछ ।