एन्फाको विवाद सतहमा, वरिष्ठ उपाध्यक्षसहित ९ जनाले गरे सभा बहिस्कार

१४ फागुन, काठमाडौं । अखिल नेपाल फुटबल संघ (एन्फा) को विवाद सतहमा आएको छ । विवादका कारण वरिष्ठ उपाध्यक्षसहित ९ केन्द्रीय सदस्यले आजको साधारण सभा बहिस्कार गरेका छन् । बैठकमा राखिएको एजेण्डका विषयमा सभाहलमै विवाद देखिएको छ 

एन्फाको केन्द्रीय समितिका २१ जनामध्ये उपाध्यक्ष दावा लामा यसअघि देखिनै फरार छन् । सदस्य पेमा लामा र सरिला श्रेष्ठ साउदी अरेबियामा छन् भने भरत बुढा अनुपस्थित छन् । बाँकी १७ मध्ये असन्तुष्ट ९ जना बाहिर छन् । अध्यक्ष सहित ८ जना मात्र बैठक हलमा छन् ।

संखमुलको एक बैंक्वेटमा जारी साधारणसभामा केन्द्रीय कार्यसमितिमा छलफल नगरेका विषयलाई साधारणसभाको एजेन्डामा राखेको भन्दै वरिष्ठ उपाध्यक्ष वीरबहादुर खड्कासहित १० जनाले साधारणसभा बहिस्कार गरेका हुन् ।

साधारणसभाको एजेण्डा तय गर्न फागुन ३ देखि ६ गतेसम्म केन्द्रीय कार्यसमितिको बैठक बसेको थियो । लेखा प्रतिवेदन, आर्थिक नियमावली र आर्थिक कार्यविधि संशोधन प्रस्तावबारे छलफल भएपनि प्रस्तावित विषयमा बहुमत सदस्यको असहमति नभएको र महासचिवले उपस्थितिको हस्ताक्षर दुरुपयोग गरेको आरोप लगाइएको छ ।