दुई मन्त्रीलाई जिम्मा दिइयो बालकुमारीको प्रतिवेदन, २० गतेभित्र जानकारी दिनुपर्ने

१४ फागुन, काठमाडौं । सरकारले बालकुमारी घटना जाँचबुझ आयोगको प्रतिवेदन अध्ययन गर्न दुई मन्त्रीलाई जिम्मा दिएको छ । प्रधानमन्त्री पुष्पकमल दाहाल प्रचण्डको चाहनाअनुसार यस प्रतिवेदन अध्यायन गर्न दुई मन्त्रीलाई जिम्मा लगाइएको हो । 

मन्त्रिपरिषद्को सोमबार बसेको बैठकले प्रतिवेदन अध्ययन गरी २० गतेभित्र जानकारी गराउन कानुन, न्याय तथा संसदीय मामिलामन्त्री धनरााज गुरुङ र ऊर्जा, जलस्रोत तथा सिँचाइमन्त्री शक्तिबहादुर बस्नेतलाई दिइएको छ । कारवाही गर्नुपर्ने भए उनीहरुले सिफारिस गर्नेछन् । 

मन्त्रिपरिषदको निर्णयबारे जानकारी दिँदै सञ्चार तथा सूचना प्रविधिमन्त्री रेखा शर्माले भनिन्, ‘बालकुमारी घटनाका सम्बन्धमा जुन प्रतिवेदन प्राप्त भएको छ, समितिले यसको अध्ययन गर्ने छ र कार्यान्वयनका सम्बन्धमा सरकारलाई सिफारिस गर्नेछ ।’

बैठकले अस्पतालसम्बन्धी विवादलाई लिएर सर्लाहीको बरथवामा भएको आन्दोलनका क्रममा प्रहरीको गोली लागेर मृत्यु भएका जयशंकर साहको परिवारलाई १० लाख रुपैयाँ राहत दिने निर्णय पनि गरेको छ । मन्त्रिपरिषले सुन तस्करी जाँचबुझ आयोगको म्याद फागुन मसान्त थप गरेका छ ।