सुनको सिक्री नदिए बेहुली लान्न भन्ने दुलाहासहित ८ जना पक्राउ

२८ फागुन, जनकपुरधाम । सुनको सिक्री दाइजो नदिएको निहुँमा जनकपुरमा एउटा विवाह भाँडिएको छ । दाइजोमा सुनको सिक्री नदिए बेहुली लान्न भन्दै विवाह अस्वीकार गर्ने दुलाहासहित प्रहरीले ८जनालाई पक्राउ गरेको छ ।

बेहुला बारा कलैया उपमहानगरपालिका–४ सिनेमा चौक बस्ने उमेश साहसहित ८ जनालाई पक्राउ गरेको हो । पर्साको वीरगञ्ज महानगरपालिका–२४ रानीघाटका सुखल साहकी अन्दाजी २४ वर्षीय छोरी रमिता कुमारीको सोमबार राति बिहे थियो । स्थानीयले विवादबारे जानकारी दिएपछि प्रहरी पुगेको थियो । 

बेहुली पक्षले नगद १२ लाख, मोटरसाइकल बापत ३ लाख २५ हजार, एक थान ल्यापटप र एक एक थान सुनको औठी र हनुमानको माला दाइजो लेनदेन गर्ने सहमतिमा गरेका थिए । ती सबै सामान उनलाई बिहे अघि नै दिइसकेको बेहुली पक्षको भनाइ छ ।  

बरमाला विधि भइसकेपछि विवाह मण्डपमा बेहुला साहले सुनको सिक्री नदिएको भन्दै विवाह इन्कार गरका थिए । त्यसपछि दुवै पक्षमा विवाद सुरु भएको थियो । बेहुलाले जन्ती फर्काउन खोज्दा मण्डपमा प्रहरी पुगेको थियो । त्यसपछि बेहुलासहित ८ जनालाई पक्राउ गरेर लगेको हो । 

विवाद भएपछि गएर बेहुला पक्षका ८ जनालाई पक्राउ गरेको वडा प्रहरी कार्यालय श्रीपुरका प्रहरी निरीक्षक धर्मजंग थिङ्ले जानकारी दिए । उनले पक्राउ परेकाहरूलाई आवश्यक कारवाहीको लागि जिल्ला प्रहरी कार्यालय पर्सा पठाइएको बताए ।