लागूऔषध नाइट्रोभेट ट्याब्लेटसहित एकजना पक्राउ

२९ फागुन, वीरगञ्ज । वीरगञ्जमा प्रहरीले ठूलो परिमाणमा लागू औषधसहित एक पुरुषलाई पक्राउ गरेको पक्राउ पर्नेमा वीरगन्ज महानगरपालिका वडा नम्बर १३ राधेमाई घर भएका ४८ वर्षिया विनोद गुप्ता रहेका छन् । गुप्तालाई नेपालमा प्रतिबन्धित लागूऔषध नाइट्रोभेट ट्याब्लेट एक हजार ८०० पिससहित पक्राउ गरिएको पर्साका प्रहरी प्रवक्ता प्रहरी नायब उपरीक्षक कुमार विक्रम थापाले जानकारी दिए ।

थापाका अनुसार,सोमबार दिउँसो वीरगञ्जको पावर हाउस चोकबाट गण्डक चोक तर्फ पैदल जाँदै गरेका गुप्तालाई प्रहरीले पावर हाउस चोकमा रोकेर चेकजाँच गरेको थियो । त्यसक्रममा उनको शरीर खानतलासी गर्दा उनले बोकेको कालो प्लाष्टिकको झोलाबाट ३० ट्याब्लेटका दरले ६० पत्तामा एक हजार ८०० पिस प्रतिबन्धित लागूऔषध नाईट्राभेट ट्याबलेट फेला परेको थापाले बताए ।

लागूऔषधसहित पक्राउ परेका गुप्तालाई प्रहरी हिरासतमा राखेर उनीविरुद्ध लागूऔषध सम्बन्धी कसुरमा थप अनुसन्धान भइरहेको जानकारी थापाले दिए ।