मनकुमारी सिंहलाई डेढलाख धरौटीमा रिहा गर्न आदेश

४ चैत, काठमाडौं । जिल्ला अदालत काठमाडौंले दैलेखको नौमुले घर भएकी २४ वर्षीया मनकुमारी सिंहलाई धरौटीमा रिहा गर्न आदेश दिएको छ । थापाथली स्थित प्रसूति तथा स्त्रीरोग अस्पतालबाट बच्चा चोरी गरेको आरोपमा सिंहलाई पक्राउ गरिएको थियो । 

अदालतले १ लाख ५० हजार धरौटीमा छाड्न आदेश गरेको छ । न्यायाधीश माधवप्रसाद अधिकारीको इजलासले मन कुमारीलाई डेढ लाख धरौटीमा रिहा गर्न आदेश गरेको हो । प्रसूति गृहबाट २६ दिने बालिका चोरीमा संलग्न सिंहलाई जिल्ला सरकारी वकिल कार्यालय काठमाडौंले अपहरण तथा शरीर बन्धक कसुरको अभियोगपत्र दायर गरेको थियो । 

मनकुमारीले काभ्रेको चौंरीदेउराली गाउँपालिका–३ घर भएर कपन बस्ने सबिना श्रेष्ठबाट जन्मिएकी बालिका चोरेकी हुन् । उनले पटक पटक गर्भ खेर गएर बच्चा नबसेपछि बेहोशीमा बच्चा चोरेको बताउँदै आएकी थिइन् ।