सरकारका न्युनतम साझा कार्यक्रम आज सार्वजनिक गरिने

६ चैत, काठमाडौं । सरकारका न्यूनतम् साझा कार्यक्रम आज सार्वजनिक गरिने भएको छ । सत्ता गठबन्धनमा आबद्ध दलहरूका साझा कार्यक्रम दिउँसो २ बजे सार्वजनिक गरिने जनाइएको छ । 

दिउँसो २ बजे कार्यक्रम सार्वजनिक गर्न लागिएको प्रधानमन्त्रीको सचिवालयले जानकारी गराएको छ । यसअघि, हिजो नै साझा न्यूनतम् कार्यक्रम सार्वजनिक गर्ने भनिएको थियो । गएको शनिबार सत्ता गठबन्धनको कार्यदलले बालुवाटार पुगेर शीर्ष नेताहरूलाई साझा न्यूनतम् कार्यक्रम बुझाएको थियो ।

सरकारमा सहभागी पाँच दलबाट दुई÷दुई नेता कार्यदलमा थिए । कार्यदलमा नेकपा एमालेबाट उपाध्यक्ष विष्णु पौडेल र उपमहासचिव विष्णु रिमाल थिए । नेकपा माओवादीबाट उपमहासचिव एवं अर्थमन्त्री वर्षमान पुन र उपमहासचिव जनार्दन शर्मा थिए ।
 
कार्यदलमा राष्ट्रिय स्वतन्त्र पार्टी (रास्वपा)बाट उपसभापति स्वर्णिम वाग्ले र महामन्त्री मुकुल ढकाल थिए भने जनता समाजवादी पार्टी (जसपा)बाट वरिष्ठ नेता राजेन्द्र श्रेष्ठ र प्रवक्ता मनिष सुमन थिए । नेकपा एकीकृत समाजवादीबाट महासचिव घनश्याम भुसाल र उपाध्यक्ष प्रमेश हमाल थिए ।