प्रधानमन्त्री निवासमा विप्लवले बोलाए मोर्चाको बैठक

९ चैत, काठमाडौं । सत्ता समीकरण फेरिएपछि पहिलो पटक समाजवादी मोर्चाको बैठक बसेको छ । मोर्चाका संयोजक नेत्र बिक्रम चन्दले बिहीबार साँझ नेकपा एमालेका अध्यक्ष केपी शर्मा ओलीलाई भेटेपछि शुक्रबार बिहान मोर्चाको बैठक बोलाएका थिए । 

समाजवादी मोर्चाको बैठक प्रधानमन्त्रीको सरकारी निवास बालुवाटारमा बसेको छ । बैठकमा पछिल्लो राजनीतिक अवस्था र मोर्चाका गतिविधिबारे छलफल भएको प्रधानमन्त्रीका प्रेस सल्लाहकार गोविन्द आचार्यले जानकारी दिए । 

 सरकारी कामकाज र प्रधानमन्त्री बस्ने बालुवाटारमा मोर्चाको बैठक बोलाएपछि त्यसको आलोचना सुरु भएको छ । मोर्चामा सत्तामा रहेका र नरहेका दलहरू आबद्ध छन् । मोर्चाले सरकार र जनताका सेवाका बारेमा कुनै छलफल र निर्णय गर्दैन । तरपनि त्यसको बैठक भने प्रधानमन्त्रीको सरकारी निवासमा भइरहेको छ । 
 
मोर्चामा नेकपा माओवादी केन्द्र, जनता समाजवादी पार्टी (जसपा), नेकपा एकीकृत समाजवादी र नेत्र विक्रम चन्द विप्लव नेतृत्वको नेपाल कम्युनिस्ट पार्टी सहभागी छन् । विप्लवले हाल मोर्चाको नेतृत्व गरिरहेका छन् । बिहीबार बेलुका मात्रै नेता विप्लवले नेकपा एमालेका अध्यक्ष केपी शर्मा ओलीसँग भेटेर छलफल गरेका थिए ।