गृहमन्त्रीलाई शेखरको सुझाव, ‘अहिले राजीनामा दिएर बस्नुस्, निर्दोष ठहरिए फेरी मन्त्री बन्नुहोला’

१० चैत, काठमाडौं । नेपाली कांग्रेसका वरिष्ठ नेता डा. शेखर कोइरालाले उपप्रधान तथा गृहमन्त्री रवि लामिछानेलाई राजनीतिमा नैतिकता देखाउन आग्रह गरेका छन् । उनले एक जना अनैतिक बन्दा समग्र सिस्टम बिग्रने र राजनीतिबाट नैतिकता हराएर जाने बताएका छन् । उनले आरोप लागेपछि नैतिक आधारमा लामिछाने एक मिनेट पनि पदमा बस्न नहुने बताएका छन् ।

काठमाडौंको मध्ये बानेश्वरमा पार्टीका स्थानीय कार्यकर्तासँगको भेटमा कोइरालाले तत्कालका लागि राजीनामा दिएर अनुसन्धानमा सहयोग गर्दै यसको टुंगो लाग्यो र निर्दोष साबित भए फेरि मन्त्री भएर काम गर्न सुझाव दिए । आरोप लागेपछि अटेर गरेर पदमा बसिरह्यो भने निर्दोष भएपनि दोषी ठहरिन्छ, त्यसैले पहिले दोष मेटाउनुपर्छ, उनले भने ।  

उनले सडकदेखि सदनसम्म चौतर्फी विरोध भइरहँदा पनि रवि पदमा बसिरहनुको पछाडि केही रहस्य लुकेको बताए । कोइरालाले सत्ता गठबन्धनले यति ठूलो बदमासी गरिरहँदा पनि काठमाडौंका चेतनशील मानिस चुपचाप बसिरहँदा अचम्म लागेको बताए । हरेक परिवर्तनमा काठमाडौंबासीको भूमिका महत्वपूर्ण रहेको बताउँदै कोइरालाले अबका दिनमा पनि निरन्तर खबरदारीको आवश्यकता रहेको बताए ।

स्थानीय कार्यकर्ताले पार्टीमा चाकडी प्रथा हावी भएको, सरकारमा सहभागी हुँदा कांग्रेसका मन्त्रीहरूले जनताको भावनाअनुसार काम गर्न नसकेको र लामो समय पार्टी एकै व्यक्तिको हातमा भएकाले कांग्रेस कमजोर भएको गुनासो गरेका थिए ।