संघमा गठबन्धन फेरिएपछि प्रदेशमा पनि फेर्नुपर्छ भन्ने मान्यताले संघीयता बलियो हुँदैनः शेखर कोइराला

१३ चैत, काठमाडौं । नेपाली कांग्रेसका वरिष्ठ नेता डा.शेखर कोइरालाले संघ गठबन्धन परिवर्तन हुने बित्तिकै प्रदेश सरकारलाई पनि फेर्नुपर्छ भन्ने मान्यता गलत भएको बताएका छन् । उनले केन्द्रीय सत्ताको अस्थिरता प्रदेशमाथि लाद्न खोज्दा संघीयता असफल हुने बताएका छन् । 

कोइरालाले सामाजिक सञ्जाल फेसबुक पेजमा पटक–पटक प्रदेश सरकार बन्नु र ढल्नु विकास र संघीयताको स्थायित्वका लागि बेठीक भएको बताएका छन् । उनले देशमा कुनै स्थायी गठबन्धन नभएकाले संघ र प्रदेशमा एउटै गठबन्धन हुनुपर्छ भन्ने राजनीतिक संस्कार गलत भएको तर्क गरेका छन् ।

स्थायी गठबन्धन नहुँदा त्यसको असर संघमा परिरहेको र यसले प्रदेशमा पनि प्रभाव पार्दा विकासमा बाधा पर्ने मात्र नभएर व्यवस्थामाथि प्रश्न उठ्ने बताएका छन् । वर्तमान प्रदेश सभाको अंकगणित संघकै गठबन्धन अनुरूप भएको भन्दै उनले यसबाट थप अस्थिरता आउने दावी गरेका छन् । 

केन्द्रकै अनुसार प्रदेशमा पनि सरकार बनाउन खोजे कुनै प्रदेशमा संवैधानिक र कानुनी जटिलता आउने तथा कुनै प्रदेशमा मध्यावधिमा जाने देखिने बताउँदै नेता कोइरालाले मध्यावधि निर्वाचन आजको आवश्यकता र बाध्यता दुवै नभएको उल्लेख गरेका छन् । 

यसले संघीयता विरोध स्वरहरूलाई मलजल गर्ने उनको भनाइ छ । प्रदेश सरकारलाई स्थायित्व दिन छलफल जरुरी रहेको उनको भनाइ छ । केन्द्रमा नेकपा एमाले नेतृत्वमा नयाँ सत्ता समीकरण बनेसँगै प्रदेश सरकारमा पनि त्यसको असर परेको छ । त्यसको सिकार प्रदेश सरकारका प्रमुखहरू हुने गरेका छन् । 

कोइरालाले लेखेका छन, ‘निर्वाचन भएको डेढ बर्षमै पटक–पटक प्रदेश सरकारहरू बन्नु र ढल्नु विकास र संघीयताको स्थायित्वका लागि बेठीक हुन् । हाम्रो देशमा कुनै स्थायी गठबन्धन नभएकाले संघ र प्रदेशमा एउटै गठबन्धन हुनुपर्छ भन्ने छैन र हुनुहुँदैन । वर्तमान प्रदेश सभाका अंकगणित हेर्दा संघकै गठबन्धन अनुरूप प्रदेशमा पनि सरकार बनाउन खोजे कुनै प्रदेशमा संवैधानिक र कानूनी जटिलता आउने तथा कुनै प्रदेश मध्यावधिमा जाने देखिन्छ । मध्यावधि निर्वाचन आजको आवश्यकता र बाध्यता दुवै होइन । यसले संघीयता विरोधी स्वरलाई मलजल गर्दछ । तसर्थ हरेक विकल्पमा छलफल गरौं र हालका प्रदेश सरकारहरूलाई स्थायित्व दिऊँ ।’