गलत नियतले सीडीओहरुलाई निर्देशन दिएको हैनः गृहसचिव

१४ चैत, काठमाडौं । गृहसचिव एकनारायण अर्यालले शान्ति सुरक्षा र अपराध नियन्त्रणका लागि गृह मन्त्रालयले जिल्ला प्रशासनलाई दिएको निर्देशनमा अरु कुनै कैफियत नरहेको बताएका छन् । सामाजिक सञ्जाललगायतका माध्यमबाट आउने गलत सूचनालाई रोक्न र कारवाही गर्न निर्देशन दिइएको उनको भनाइ छ ।

मंगलबार संसदको राज्य व्यवस्था तथा सुशासन समितिको बैठकमा उनले यो गृहले जारी गरेको निर्देशनलाई विभिन्न सञ्चारमाध्यममा आएका विरोधलाई लक्षित गर्दै यसमा कुनै कैफियत नभएको बताएका हुन् । प्रभावकारी सेवा, नियमन र उद्धारका लागि निर्देशन दिएको उनको भनाइ थियो ।  

अपराध नियन्त्रण र सीमा सुरक्षामा विशेष सरकारले विशेष ध्यान केन्द्रित गरेको उनले बताए । आत्महत्या, बैंकिङ कसुर, चोरी र हत्याजस्ता घटना अन्य भन्दा ८० प्रतिशतले बढेको जानकारी पनि उनले दिए ।

अर्यालले शान्ति सुरक्षा कायम गर्न र मानिसहरूको आवतजावत प्रभावित हुन नदिन काठमाडौं उपत्यकाका विभिन्न स्थानमा घोषणा गरिएको निषेधित क्षेत्र जायज भएको बताए। यद्यपि निषेधित घोषणा गरिएका क्षेत्रको विकल्प दिने बारे छलफल भइरहेको उनले जानकारी दिए ।

अर्यालले बालकुमारी घटनाको प्रतिवेदन अध्ययनको चरणमा रहेको बताए । गत पुस १३ ग ते ललितपुरको बालकुमारीस्थित ईपीएस कोरिया शाखा कार्यालयमा परीक्षा फाराम भर्ने विषयलाई लिएर भएको प्रदर्शनका क्रममा प्रहरीको बल प्रयोग गर्दा २ जनाको मृत्यु भएको थियो । उक्त घटनालाई लिएर सरकारले न्यायिक जाँचबुझ आयोग गठन गरेको थियो ।

हाल शान्ति सुरक्षाको अवस्था सामान्य रहेको र बन्द हडतालका कार्यक्रम नरहेको उनको भनाइ छ । पर्यटक संख्या भएको र एक महिनामा एक लाख पर्यटक भित्रिएको पनि उनले समितिमा जानकारी गराए ।

यस्तै नेपाल प्रहरीका महानिरीक्षक वसन्त बहादुर कुँवरले ललितपुरको ढोलाहिटी घटनाबारे अनुसन्धान गरिरहेको जानकारी दिए । समिति बैठकमा घटनाबारे जानकारी दिँदै महानिरीक्षक कुँवरले होली मनाउने क्रममा भएको विवाद पहिलेकै झगडासँग जोडिएको पनि जानकारी दिए ।