मुख्यमन्त्री नपाए गठबन्धन छोडने धम्कीपछि माधव नेपालको भागमा पर्यो सुदूरपश्चिम प्रदेश

१९ चैत, काठमाडौं । नेकपा एकीकृत समाजवादीका अध्यक्ष माधवकुमार नेपालले सत्ता गठबन्धनलाई धम्क्याएर नै सुदूरपश्चिम प्रदेशको मुख्यमन्त्री हात पारेका छन् । नेकपा एसलाई सुदूरपश्चिम प्रदेशको मुख्यमन्त्री दिने सहमति गठबन्धनमा भएको छ । 
 
नेकपा एसका अध्यक्ष नेपालले सातमध्ये कम्तीमा एक मुख्यमन्त्री आफ्नो पार्टीलाई नदिएर गठबन्धनबाट बाहिरिने बैठकमै चेतावनी दिएका दिए । त्यसपछि बालुवाटारमा सोमबार भएको गठबन्धन बैठकमा एकीकृत समाजवादीलाई तत्काल सुदूरपश्चिम प्रदेशको मुख्यमन्त्री दिने सहमति बनेको नेकपा एसका एक नेताले जानकारी दिए । 

सोमबार बिहान प्रधानमन्त्री पुष्पकमल दाहाल प्रचण्ड, नेकपा एमालेका अध्यक्ष केपी शर्मा ओली र एकीकृत समाजवादी अध्यक्ष नेपालबीच छलफल भएको थियो । सुदूरपश्चिम प्रदेशको मुख्यमन्त्री दिने भनेपछि मात्र नेपालले बागमती प्रदेशका मुख्यमन्त्रीलाई विश्वासको मत दिन सांसदलाई निर्देशन दिएका थिए । अब बागमतीका मुख्यमन्त्री शालिकराम जम्कट्टेललाई एकीकृत समाजवादीले विश्वासको मत दिनेछ ।