विभाजनतिर नाउपा, रेशमले बोलाएको बैठक बहिस्कार गर्न अध्यक्ष रञ्जिताको उर्दी

२० चैत, काठमाडौं । सत्ता गठबन्धनमा रहने कि विपक्षी गठबन्धनमा रहने भन्नेबाट सुरु भएको नागरिक उन्मुक्ति पार्टी ( नाउपा) को विवाद उत्कर्षमा पुगेको छ । पार्टीका संरक्षक रेशम चौधरी र अध्यक्ष रञ्जिता श्रेष्ठ चौधरीबीच विवादले नाउपा विभाजनउन्मुख देखिएको हो । रञ्जिता र रेशम नातामा पतीपत्नि हुन् । तर, राजनीतिक रुपमा उनीहरूबीच निकै भिन्नता उत्पन्न भएको छ । 
 
मंगलबार उनीहरुलाई प्रधानमन्त्री पुष्पकमल दाहाल प्रचण्डले पनि बोलाएर छलफल गरेका थिए । प्रधानमन्त्रीसँग भेटेपछि अध्यक्ष रञ्जिताले आगामी २२ र २३ गते काठमाडौंमा डाकिएको बैठक आधिकारिक नभएको सूचना जारी गरेकी छन् । सूचना जारी गर्दै बैठक केन्द्रीय सदस्य तथा पदाधिकारीहरूलाई बोलाइएको बैठक आधिकारिक नभएको भन्दै भाग नलिन भनेकी छन् । 

यसबाट नाउपाको विवाद थप चर्किएको प्रष्टै भएको छ । अध्यक्ष रञ्जिताले रेमश चौधरी पक्षले बोलाएको बैठक आधिकारिक नभएको भन्दै सूचना निकालेरै बहिस्कार गर्न भनेकी छन् ।

टीकापुर महाधिवेशन (जसलाई निर्वाचन आयोगले मान्यता दिएन) बाट महासचिव बनेका गंगाराम चौधरीले सोमबार सूचना निकालेर २३ र २४ चैतमा बैठक आह्वान गरेका थिए । उनले पार्टीको महत्वपूर्ण विषयमा छलफल गर्नुपर्ने भएकाले सक्कल नागरिकता र मतदाता परिचयपत्र लिएर आउन भनेका थिए ।

तर मंगलबार रञ्जिता (जसलाई निर्वाचन आयोगले वैधानिकता दिएको छ) ले मंगलबार त्यो बैठक आधिकारिक नभएको बताएकी छन् । केन्द्रीय सदस्य तथा पदाधिकारीलाई सम्बोधन गर्दै उनले निकालेको सूचनामा २३ र २४ गते बोलाएको बैठक आधिकारिक नभएको उल्लेख छ ।