प्रतिनिधिसभामा गुनासो, ‘सांसदको लोगो देख्नासाथ जनताले हामीलाई सहकारी ठग भन्न थाले’

२१ चैत, काठमाडौं । सांसदहरूले प्रतिनिधिसभाको बैठकमा आफूहरूलाई सार्वजनिक ठाउँमा सांसदको लोगो लगाएर हिँड्न पनि समस्या भएको बताएका छन् । सांसदको लोगो देख्नासाथ आम मानिसले यो सहकारी ठग हो भन्न थालको गुनासो गरेका छन् । गृहमन्त्री रवि लामिछानेमाथि सरकारी ठगीको आरोप लागेपछि सांसदहरूलाई सार्वजनिक स्थान र सवारी साधनामा समेत लोगो फुकाल्नु पर्ने अवस्था आएको सांसदको भनाइ छ ।

बुधबारको प्रतिनिधि सभाको बैठकमा शून्य समयमा नेपाली कांग्रेसका सांसद रमा कोइराला पौडेलले सार्वजनिक गाडीमा लोगो लगाएर हिँडौं कि नहिँडौं ? भन्दै प्रश्न गरेकी छन् । उनले गाडीमा सांसदको लोगो लगाउँदा यात्रुले सहकारी ठग भन्ने गरेको गुनासो सुनाइन् । 

उनले भनिन्,‘सम्माननीय ज्यू म सार्वजनिक गाडीमा हिँड्छु । मेरो यो सांसदको लोगो देखेपछि सबैले मलाई यो सहकारी ठग हो भन्छन् । उहाँहरूलाई मैले के जवाफ दिनु ।’ सहकारी ठगीमा पहिले उपप्रधान तथा गृहमन्त्रीको नाम आएकोमा त्यसमा कुनै कारबाही नभएको उनको भनाइ छ । 

अहिले रास्वपाका उपसभापति तथा श्रममन्त्री डीपी अर्याल, माओवादीका नेता तथा उर्जामन्त्री शक्तिबहादुर बस्नेतको नाम पनि सहकारी प्रकरणमा जोडिएर आएको भन्दै गाडीमा सांसदको लोगो प्रयोग गरौँ कि नगरौँ भन्दै उनले प्रश्न गनिन् । लोगो लगाएर सार्वजनिक ठाउँमा हिँड्दा इमान्दार सांसद पनि ठग बन्नु परेको उनले बताइन् ।