सरकारले सहकारी प्रकरणमा गृहमन्त्री लामिछानेमाथि छानबिन गर्न संसदीय समिति नबनाउने

२२ चैत, काठमाडौं । सरकारले उपप्रधान तथा गृहमन्त्री रवि लामिछाने सरकारी प्रकरणमा मुछिएको बारे छानबिन गर्न समिति नबनाउने भएको छ । प्रमुख प्रतिपक्षी दल नेपाली कांग्रेसले संसदीय छानविन समिति नबनाएसम्म संसद बैठक चल्न नदिने बताइरहेका बेला सरकारले यस्तो समिति नबनाउने बताएको हो । 
 
बिहीबार नेपाल सरकारका प्रवक्ता रेखा शर्माले उपप्रधानमन्त्री एवं गृहमन्त्री रवि लामिछानेमाथि लागेको आरोप छानबिन गर्न सरकारले उच्चस्तरीय छानबिन समिति नबनाउने बताएकी हुन् । मन्त्रिपरिषद बैठकको निर्णयबारे सञ्चारकर्मीलाई जानकारी दिने क्रममा उनले समिति नबन्ने बताएकी हुन् ।
 
गृहमन्त्रीमाथि लागेको आरोप प्रमाणित हुने गरी यथेष्ट प्रमाण नभेटिएको, सोही विषयमा प्रधानमन्त्री र गृहमन्त्रीले संसद तथा समितिमा बोलिसकेकोले समिति गठन नगरिने शर्माले बताइन् । गृहमन्त्रीमाथि संसद्मा उठेको प्रश्नको विषयमा प्रधानमन्त्रीले संसदमा उपस्थित भएर बोलिसक्नु भएको छ । स्वयम् गृहमन्त्रीले पनि संसदीय समितिमा बोलिरहनुभएको छ । अहिले  छानबिन समिति बनाउनुपर्ने यथेष्ट प्रमाण नभेटिएकाले बन्दैन, प्रवक्ता शर्माले भनिन् ।