जिल्ला पुगेको ५० दिनमा एसपीले के गल्ती गरे ? सात जिल्लाका प्रमुख फेरिए

२३ चैत, काठमाडौं । प्रहरी प्रधान कार्यालयले केही जिल्लाका एसपीलाई ५० दिन पनि काम गर्न नदिई विना कारण सरुवा गरेको छ । जिल्लाका प्रहरी प्रमुख प्रहरी उपरीक्षक 'एसपी' लाई अवधि नै ५० दिनमा कुनै कुनै युनिटको भ्रमण समेत गर्न नभ्याएको अवस्थामा सरुवा गरेको हो ।

सर्लाही, महोत्तरी, बाँके, धनुषा, बाराका प्रहरी  प्रमुखलाई अवधि नै नपुगी सरुवा गरिएको हो । प्रहरी मुख्यालयले निकालेको सूची अनुसार नुवाकोट प्रहरी प्रमुखमा एसपी शान्तिराज कोइरालालाई पठाउँदा एसपी संजय सिंह थापालाई  सुन तस्करी प्रकरणमा तानिएको थियो । मित्र बन्धु शर्मा धनुषा पुगेको ५ महिनामै फिर्ता भए । 

यस्तै बाँकेको प्रहरी प्रमुखमा तुलबहादुर कार्कीलाई पठाइएको छ । सुवास बोहरा रहेको स्थानमा उनलाई विभिन्न बहानामा सरुवा गरिएको छ । सर्लाहीमा पुगेका दयानिधि ज्ञवाली पनि ५० दिनमै फिर्ता हुने अर्का प्रहरी अधिकारी हुन् । यस्तै बारा प्रहरी प्रमुखमा एसपी महेन्द्र खड्कालाई पठाइएको छ भने रौतहट प्रहरी प्रमुखमा एसपी दिलीप घिमिरेलाई पठाइएको छ । 

यसैगरी सर्लाहीको प्रहरी प्रमुखमा एसपी रविन्द्र सिंह, महोत्तरीको प्रहरी प्रमुखमा एसपी नहकुल पोखरेल पठाइएको छ । पोखरेल केही महिना अघि मात्रै सरुवा भएर काठमाडौं आएका थिए । धनुषाको प्रहरी प्रमुखमा एसपी भुवनेश्वर तिवारीलाई पठाइएको प्रहरी प्रधान कार्यालयले जनाएको छ । त्यहाँ यसअघि विश्वराज खड्का रहेका थिए । 

उनको स्थानमा मित्र बन्धु शर्मालाई खटाइएको थियो । फागुन ३ गते सरुवा भएका एसपीले कार्यक्षेत्रमा के कमजोरी गरे भन्ने बारेमा कुनै कारण खुलाइएको छैन ।