संसदीय समिति गठन नभएसम्म सदन चल्न नदिने कांग्रेसको निर्णय

२७ चैत, काठमाडौं । नेपाली कांग्रेस संसदीय दलको बैठकले सहकारीको रकम हिनामिना प्रकरणमा गृहमन्त्री रवि लामिछानेको संलग्नता रहेको कुरामा निष्पक्ष छानबिनका लागि संसदीय समिति गठन नभएसम्म सदन चल्न नदिने निर्णय गरेको छ । 

संसदीय दलको बैठकले पार्टीको बटम लाइन नै समिति गठन भएको जनाएको छ । प्रमुख सचेतक रमेश लेखकले सानातिना विषयमा कांग्रेसले सदन अवरोध नगर्ने बताउँदै सहकारीमा लाखौँ हिनामिना प्रकरणमा गृहमन्त्रीको संलग्नता देखिएकाले छानबिन जरुरी रहेको बताए । त्यससँगै आजको बैठकले तत्काल नेपाली कांग्रेसको माग बमोजिम संसदीय छानबिन समिति गठन गर्न सरकारसँग माग गर्ने निर्णयसमेत गरेको उनले बताए ।

उनले भने, ‘उपप्रधानमन्त्री एवं गृहमन्त्री माननीय रवि लामिछाने जी सहकारीको रकम अपचलन गर्ने काममा संलग्न भएको कुरालाई हामीले उठाइरहेका छौं । त्यसको निष्पक्ष, स्वतन्त्र र विश्वसनीय अनुसन्धानका निमित्त संसदीय समिति गठन गर्ने माग हामीले गरिराखेका छौं । आजको संसदीय दलले नेपाली कांग्रेसले उठाउँदै आएको काम उचित छ भन्ने ठहर गरेको छ, सर्वसम्मतीले ।’