रास्वपाका नेता जोडिएको हाम्रो नयाँ कृषि सहकारीका आरोपीहरुविरुद्ध पनि मुद्दा नचल्ने

५ वैशाख, काठमाडौं । प्रहरीले गृहमन्त्री रवि लामिछाने सभापति रहेको राष्ट्रिय स्वतन्त्र पार्टीका नेता जोडिएको एक सहकारीका आरोपीमाथि कारवाही नचलाउने  राय दिएको छ । काठमाण्डौंस्थित हाम्रो नयाँ कृषि सहकारीको रकम हिनामिना प्रकरणमा मुद्दा नचलाउने निर्णय प्रहरीले गरेको हो । सीआईबीको राय अनुसार जिल्ला सरकारी वकिल कार्यालय काठमाडौंले मुद्दा नचल्ने निर्णय गरेको छ । 
 
सो निर्णयसँगै सहकारीको रकम हिनामिना गरेको आरोपमा पक्राउ गरिएका ३ जना छुटेका छन् । नयाँ कृषि सहकारी संस्थाका उपाध्यक्ष लिलाबहादुर गुरुङ, कोषाध्यक्ष रामहरि अधिकारी र नविन अछामीलाई थुनामुक्त गरिएको सीआईबीले जनाएको छ । सीआईबीले चैत १८ मा रामहरि अधिकारीलाई र त्यसपछि थप दुई जनालाई पक्राउ गरेर अनुसन्धान गरेको थियो । 

जाहेरवालाको रकम फिर्ता गरेपछि उनीहरुविरुद्ध मुद्दा नचल्ने निर्णय गरिएको सीआईबी जनाएको छ । नयाँ कृषिको सञ्चालक समितिका सदस्य दुर्गा चापागाईं बुटवलमा थुनामा छन् । सुप्रिम सहकारी ठगी प्रकरणमा थुनामा रहेका उनलाई सीआईबीले काठमाडौँमा झिकाएर बयान लिएको थियो । सहकारी विभागले गत असोजमा सो सहकारीबारे अनुसन्धान गर्न सीआईबीलाई पत्राचार गरेको थियो ।  

रास्वपाका उपसभापति एवं श्रममन्त्री डिपी अर्याल यस सहकारीको रकम ठगीमा संलग्न रहेको आरोप लगाएको थियो । रास्वपा उपसभापति अर्याल र सहमहामन्त्री कवीन्द्र बुर्लाकोटीमाथि सहकारीको रकम अपचलनमा संलग्न रहेको भन्दै कारवाहीको माग गरिएको थियो । तत्कालीन समयमा अर्याल उपाध्यक्ष रहेको हाम्रो नयाँ कृषि सहकारी संस्थाको उपाध्यक्ष हुँदा निक्षेपकर्ताले चार करोडभन्दा बढी रकम फिर्ता नभएको बताइएको छ । सहकारी प्रकरणमा सत्तारुढ दल रास्वपाका उच्च तहका ४ जना नेता जोडिएका छन् ।