प्रचण्डको प्रधानमन्त्री पद अब धेरै दिन रहन्नः डा. भट्टराई

९ वैशाख, अर्घाखाँची । पूर्वप्रधानमन्त्री एवं नेपाल समाजवादी पाटीका अध्यक्ष डा. बावुराम भट्टराईले पुष्पकमल दाहाल प्रचण्ड अब प्रधानमन्त्रकिा रुपमा धेरै दिन नरहने बताएका छन् । जता काफल पाक्यो उतै नाच्दै हिँड्ने प्रचण्डका प्रधानमन्त्रीमा बसिरहने दिन छोटिदै गएको उनको दावी छ । 

अर्घाखाँचीको मालारानीमा भएको कार्यक्रममा भट्टराईले आन्तरिक र बाह्य राजनीति प्रचण्डका पक्षमा नभएको बताए । मुलुकमा सुशासन, आर्थिक विकास, राजनीति स्थिरता र भ्रष्टाचार नियन्त्रण लगायत सबै हिसाबले प्रधानमन्त्रीका रुपमा प्रचण्ड असफल भएकाले उनको नेतृत्वको सरकार अब धेरै दिन टिक्न नसक्ने उनले ठोकुवा गरे । 

उनले भने, ‘जता काफल पाक्यो, उतै चरी नाच्यो जस्तै गरेर, बच्चाले भाँडाकुटी बनाएर भत्काएजस्तो गरी सरकार बनाउने र भत्काउने गर्ने काम मात्रै भयो । तीन पटक सरकार फेर्दा पनि मुलुकमा थप अस्थिरता निम्तेको छ । बेरोजगारी समस्या झन बढ्दै गयो, अहिले त पढ्नका लागि विद्यार्थीले देश छाडेर जाने स्थिति आयो । राजनीति समीकरण फेरर प्रधानमन्त्री भएपनि अब माहोल अर्कैतिर मोडिएकाले उनको समय सकिन लागेको छ । राजनीतिक परिदृष्यहरु यसै भनिरहेका छन् ।’ 

दलहरु निजी कम्पनी जस्तै भएको, स्वार्थ र फाइदाका पछाडि हिँड्ने प्रवृत्तिले मुलुकमा भ्रष्टाचार दिनप्रतिदिन मौलाउँदै गएको बताए । केन्द्रमा सरकार परिवर्तन भएपछि स्वयत्ता भनिएको प्रदेश सरकार पनि भताभुंग बनाएपछि स्थिरता नभएको उनको टिप्पणी छ ।

भट्टराइले सरकारले भ्रष्टचारीलाई कारबाही र दण्डित गर्ने भन्दापनि आफ्ना नेतालाई जोगाउने र अरुसँग प्रतिशोध साँध्ने काम गरेको टिप्पणी गरे । वर्तमान गठबन्धन सरकार धेरै दिन नटिक्ने दोहोर्याएका उनले  सरकार भताभुंग पार्नेतिर ध्यान भएकाले देशमा राजनीति स्थिरता, सुशासन देश विकासको मुद्दा कसरी बन्छ भन्नेतिर सोच आवस्यक भएको उनले बताए ।