मतदातामा देखिएन उत्साह, इलाममा ५८ र बझाङमा ५० प्रतिशत मत खस्यो

काठमाडौं । इलाम–२ मा प्रतिनिधिसभा र बझाङ–१ म प्रदेशसभा सदस्य चयनका लागि शनिबार भएको उपनिर्वाचनमा शान्तिपूर्ण मतदान सकिएको छ । निर्वाचन आयोगले शनिबार साँझ जारी गरेको विज्ञप्ति अनुसार इलाममा ५८ प्रतिशत र बझाङमा ५० प्रतिशत मतदान भएको छ । 
दुवै स्थानमा ०७९ को निर्वाचन भन्दा कम मत खसेको हो । इलाममा गत ०७९ को निर्वाचनमा ५९.७८ प्रतिशत मतदान भएको थियो । यो पटक करिब ५८ प्रतिशत मत खसेको हो । निर्वाचन आयोगका अनुसार इलाम २ मा एक लाख १६ हजार ८८९ मतदाता छन् । 
यसैगरी बझाङको प्रदेश सभा क्षेत्र नं. १ पनि अघिल्लो निर्वाचनमा भन्दा कम मत खसेको छ । ०७९ मा भएको निर्वाचनमा ५२.९८ प्रतिशत मत खसेको थियो । यो पटक ५० प्रतिशत मतदाताले मतदान गरे ।   
बझाङ प्रदेशसभा १ मा कूल ६१ हजार ७८४ मतदाता थिए । यद्यपी आयोगले मतदानको विवरण आयोगको प्रणालीमा प्रविष्ट गर्ने काम भइरहेको जनाएको छ ।
 इलाममा आजै मतगणना हुने
इलाममा इलाम नगरपालिका– ७ स्थित गौतम बुद्ध सभागृहमा साँझ ११ः०० बजेभित्र मतपेटिका संकलन हुने आयोगले जनाएको छ । तर बझाङमा भने  हवाइ मार्गबाट पनि मतपेटिका ढुवानी गर्नुपर्ने भएकाले आइतबार विहान १० बजेभित्र ढुवानी भइसक्ने व्यवस्था मिलाइएको आयोगका सहायक प्रवक्ता रामदत्त पाण्डेयले जानकारी दिए ।
बझाङ जिल्ला साइपाल गाउँपालिकाको ३ स्थानका  मतपेटिका हेलिकप्टरबाट ल्याउनुपर्ने आयोगको भनाइ छ ।