मन्त्रिपरिषद बैठक बस्नुअघि प्रधानमन्त्री भेट्न सिंहदरवार पुगे अध्यक्ष ओली

२० वैशाख, काठमाडौं । नेकपा एमालेका अध्यक्ष केपी शर्मा ओली र प्रधानमन्त्री पुष्पकमल दाहाल प्रचण्डबीच वर्तमान राजनीतिका अवस्था र आगामी बजेट अधिवेशनबारे छलफल भएको छ । प्रधानमन्त्री प्रचण्डसँग छलफल गर्न अध्यक्ष ओली बिहान सिंहदरबारस्थित प्रधानमन्त्री कार्यालयमा पुगेका  थिए ।  

पछिल्लो समयमा मन्त्रिपरिषदको बैठक बस्नुभन्दा अगाडि ओली र प्रचण्डबीच छलफल हुँदै आएको छ । ओलीसँग आवश्यक छलफल गरेर मात्रै प्रधानमन्त्रीले पनि मन्त्रिपरिषदमा एजेन्डाबारे छलफल गर्ने गरेका छन् । सरकारले यही वैशाख अन्तिम साता संसदको बर्खे अर्थात् बजेट अधिवेशन बोलाउने तयारी गरेको छ । 

प्रधानमन्त्रीको सचिवालयले भने उनीहरूबीच उपनिर्वाचनको समीक्षा र समसामयिक राजनीतिक विषयमा छलफल भएको जानकारी दिएको छ । इलाम–२ मा एमाले उम्मेदवारलाई माओवादी केन्द्रले पनि समर्थन गरेको थियो ।  गठबन्धनमा एकीकृत समाजवादीका अध्यक्ष माधव नेपालको असन्तुष्टिलाई कसरी सम्बोधन गर्ने र प्रदेश सरकारलाई अगाडि बढाउने भन्नेबारे  ओली र प्रचण्डबीच छलफल भएको बताइएको छ ।