महावाणिज्य दूत बनाउने गरी ढुंगानाको परराष्ट्रमा सरुवा, राजश्वमा पुगे बुढा

२३ वैशाख, काठमाडौं । सरकारले राजश्व अनुसन्धान विभागमा महानिर्देशक फेरेको छ । माओवादीको रोजाइमा रहेका चक्रबहादुर बुढा राजश्व अनुसन्धान विभागमा पुगेका छन् । प्रधानमन्त्री प्रचण्डले आफूलाई सजिलो हुने भन्दै बुढालाई राजश्व अनुसन्धानमा लगेका हुन् । राजश्व अनुसन्धान विभाग अहिले प्रधानमन्त्री मातहतमा छ । केपी शर्मा ओलीको कार्याकालमा यो विभाग प्रधानमन्त्रीको मातहतमा लगिएको थियो । 

अर्थमन्त्री भएपछि पुनले अर्थ मन्त्रालय र मातहतका विभागहरूमा सेट नै परिवर्तन गर्ने सोच बनाएका थिए । मन्त्रालयमा सेटिङ मिलाएपछि  प्रधानमन्त्री र अर्थमन्त्रीको सल्लाहमा विभागमा पनि नेतृत्व परिवर्तन गरिएको हो । अर्थमन्त्री पुन भने अर्कैलाई विभागमा लाने तयारीमा थिए । अर्थ मातहतका निकायमा नेकपा एमालेले पनि भाग खोजेकाले पुनलाई सोचे जसरी सेट मिलाउन सजिलो भएको छैन । 

सेट मिलाउने क्रममा राजश्व अनुसन्धान विभागका महानिर्देशक नवराज ढुंगानाको परराष्ट्र मन्त्रालयमा सरुवा भएका छन् । उनलाई कलकत्ताको महावाणिज्य दूत बनाएर पठाउन परराष्ट्रमा लगिएको स्रोतको भनाइ छ । विभागमा पुगेका बुढाको हालै मात्र पर्यटन विभागबाट प्रधानमन्त्री कार्यालयमा सरुवा भएको थियो । अहिले त्यहाँबाट विभागमा पठाइएको हो ।