संसद अवरुद्धबारे रणनीति बनाउन कांग्रेसले बोलायो दलको बैठक

२३ वैशाख, काठमाडौं । नेपाली कांग्रेसले वैशाख २७ गते बस्ने गरी संसदीय दलको बैठक बोलाएको छ । सरकारले सहकारी ठगीको विषयमा छानबिन गर्न संसदीय छानबिन समिति नबनाए संसद चल्न नदिने कांग्रेसको रणनीति छ । यसै विषयमा छलफल गर्न संसदीय दलको बैठक बोलाइएको हो । 
 
मन्त्रिपरिषद्को सिफारिसमा राष्ट्रपति रामचन्द्र पौडेलबाट वैशाख २८ गते बजेट अधिवेशन आह्वान गरेका छन् । कांग्रेसले वैशाख २७ गते दिउँसो १ बजे संसदीय दलको कार्यसमिति र २ बजे दलको बैठक बोलाएको छ । नयाँ बानेश्वरस्थित लोत्सेहलमा बस्ने दलको बैठकमा संघीय संसदको बजेट अधिवेशनमा पार्टीको भूमिकाबारे छलफल गर्ने कांग्रेसले जनाएको छ । 

सहकारी ठगी प्रकरणमा मुछिएका उपप्रधान तथा गृहमन्त्री रवि लामिछानेमाथि संसदीय छानबिन समिति बनाउनुपर्ने माग कायमै राखेको छ । कांग्रेसले अडान  नछोडेपछि  सत्ता पक्षले पनि सहकारी छानबिनका लागि संसदीय समिति बनाउने विषयमा मध्यमार्गी प्रस्ताव बनाउने तयारी गरेको छ ।