मौद्रिक नीतिमा बिग मर्जर तरलता बढाउने औजार

काठमाडौं। नेपाल राष्ट्र बैंकले तरलता सहजीकरणका लागि केही नयाँ मौद्रिक औजारहरुसहित आगामी बर्षको मौद्रिक नीति असार तेस्रो साता सार्बजनिक गर्ने भएको छ।

साढे ८ प्रतिशतको आर्थिक बृद्धि लक्ष्यलाई सघाउ पुग्ने गरी खुकुलो मौद्रिक नीति ल्याउने तयारी राष्ट्र बैंकको छ। अहिले राष्ट्र बैंकले सरोकारवालाहरुसँग सुझाब मागिरहेको छ। केही दिनमै राजधानीमा सबै सरोकारवालालाई बोलाएर सुझाब संकलन गर्ने कार्यक्रम पनि तय भएको छ।

प्रत्येक बर्ष छुट्टै जगेडा कोषमा रकम छुट्याउनु नपर्ने गरी नयाँ ऋणपत्र जारी गर्न पाइने ब्यवस्था राष्ट्र बैंकले गर्दैछ। यसो हुँदा बैंकहरुसँग ऋण दिन सक्ने क्षमता अझ बढ्ने छ। सरकारले आगामी बर्षको बिकास बजेट ४ खर्ब रुपैयाँ छुट्याएको छ।

राष्ट्र बैंकले उठाइदिनु पर्ने १ अर्ब ९० अर्ब रुपैयाँको आन्तरिक ऋणपत्र जारी हुँदा तरलता असहज नहोस् भनेर उपयुक्त विधि अपनाउने गरी पनि छलफल भइरहेको छ।

आगामी मौद्रिक नीतिमा बिग मर्जरको बिषयले प्राथमिकता पाउने छ। एकथरी संख्या तोकेर मर्जरमा जानु पर्छ भन्ने छन् भने अर्कोथरी संख्या नतोकी मर्जरमा लैजानु पर्छ भन्ने छन्। राष्ट्र बैंकले यसपाली अनिवार्य तरलता अनुपात (सिआरआर) लाई चलाउँदैन भने पुनर्कर्जा कोष पनि ५० अर्बभन्दा माथि पुर्याउने छैन।

विदेशी बैंकबाट मात्र पैसा लिन पाइने विद्यमान व्यवस्थामा परिवर्तन गरी संस्था वा ब्यक्तिबाट पनि पैसा ल्याउन सकिने ब्यवस्था गरिँदैछ।