चीनको शानदोङ क्षेत्रमा लामो खडेरी, जनजीवन प्रभावित

एजेन्सी । चीनको पूर्वी शानदोङ प्रान्तमा यस वर्ष लामो खडेरीका कारण सामान्य जनजीवन प्रभावित बनेको छ ।जुन १८ सम्म खडेरीका कारण करीब छ लाख ५६ हजार ६६७ हेक्टर क्षेत्रफलमा लगाइएको खाद्यान्न तथा तरकारीबालीलगायतका अन्य व्यावसायिक खेतीमा समेत व्यापक प्रभाव परेको शानदोङ प्रान्तीय बाढी नियन्त्रण तथा खडेरी प्रभावितका लागि राहत वितरण केन्द्रले शुक्रबार जनाएको छ ।

शानदोङका अधिकारीले खडेरीका कारण जनमानसमा परेको तथा आगामी दिनमा पर्ने प्रभावलाई सम्बोधन गर्न आपत्कालीन प्रबन्धकीय कामलाई अभियानका रूपमा सरकारले अघि बढाएको छ ।

उक्त प्रान्तमा यस वर्ष गत वर्षको तुलनामा अत्यन्यै कम पानी परेको बताइएको छ । अधिकारीका अनुसार शानदोङमा यस वर्ष १०१.२ मिलिमिटर मात्रै पानी परेको छ, जुन गत वर्षको तुलनामा ३७ प्रतिशत कमी हो ।

यस वर्ष शानदोङ प्रशासनले १४ करोड १० लाख अमेरिकी डलर खडेरी–सहायता कोष खडा गरी परिचालनमा ल्याएको छ भने खडेरीको प्रभाव कम गर्ने अभियानमा करिब १५ लाख २० हजार सम्बन्धित व्यक्ति परिचालन गरिएको छ । चीनको मौसम विज्ञान अधिकारीले उक्त प्रान्तमा निकट भविष्यमा पनि थोरै मात्र बर्षा हुने अनुमान गरेका छन् ।