सोमबार नेकपाकाे सचिवालय बैठक बस्दै, एमसीसी बारे छलफल हुने

२५ जेठ, काठमाडौं । सत्तारुढ नेपाल कम्युनिस्ट पार्टी ‘नेकपा’ले सोमबार ‘भोली’ सचिवालय बैठक बोलाएको छ । अमेरिकी सहयोग परियोजना मिलेनियम च्यालेन्ज कर्पोरेसन ‘एमसीसी’ बारे छलफल प्रधानमन्त्री निवास बालुवाटारमा ४ बजे सचिवालय बैठक बोलाइएको हो ।

आज पार्टीका अध्यक्ष तथा प्रधानमन्त्री केपी शर्मा ओली र अर्का अध्यक्ष पुष्पकमल दाहाल ‘प्रचण्ड’ बीच छलफल भएपछि सचिवालय बैठक बोलाइएको स्रोतले बताएको छ ।

नेपालका विभिन्न आयोजनामा अमेरिकाले गर्न लागेको अनुदान सहयोग एमसिसीलाई लिएर नेकपाभित्रै तीव्र मतभेद छ। एमसिसीमा भएका परियोजनाको काम अघि बढाउने गरी सरकारले आगामी वर्षको बजेट ल्याएको छ। तर नेकपाका कतिपय नेताहरूले एमसिसी अमेरिकी सैन्य रणनीति भएकाले यसलाई अस्वीकार गर्नुपर्ने बताउँदै आएका छन्। यसअघि बसेको सचिवालय बैठकले संसदबाट एमसिसी पारित नहुँदासम्म यसअन्तर्गतका कार्यक्रम अगाडि नबढाउने निर्णय गरेको थियो।

यता प्रधानमन्त्री एवं नेकपाका अध्यक्ष केपी शर्मा ओली एमसीसी सम्झौता संसदबाट तत्काल पास गर्ने पक्षमा छन् । भने अर्का अध्यक्ष प्रचण्डसहितका नेताहरुले एमसीसीबारे अध्ययन गर्न पार्टीले वरिष्ठ नेता झलनाथ खनालको नेतृत्वमा बनाएको कार्यदलको प्रतिवेदनबारे स्थायी कमिटीमा छलफल गर्नुपर्ने बताउँदै आएका छन् ।