विपन्न सीमान्तकृत ६ परिवारलाई सिलाइ मेसिन सेट प्रदान

◊ धीरुभाइ

२४ भदाै, सप्तरी । कोरोना भाइरस संक्रमण फैलिन नदिन लकडाउन (बन्दाबन्दी) तथा निषेधाज्ञाबाट अतिप्रभावित विपन्न सीमान्तकृत छ परिवारका बुहारीलाई बुधबार सिलाइ कटाइ मेसिन प्रदान गरेको छ ।

भीएसओ नेपालसँगको साझेदारीमा समग्र जनउत्थान केन्द्र लहानले सप्तरीले राजविराज नगरपालिका वार्ड नम्बर ६ पुर्नीपोखरी टोलका चार, तिलाठी कोइलाडी गाउँपालिका वार्ड नम्बर ५ का एक र बोदे बर्साइन नगरपालिका ५ का एक गरी छ परिवारलाई एक-एक थान पूरा सेट मेसिन प्रदान गरेको समग्र उत्थान केन्द्रका कार्यक्रम अधिकृत रामभरोसी महतोले जानकारी दिए ।

युकेएडको आर्थिक सहयोगमा भीएसओ नेपाल र समग्र जनउत्थान केन्द्रले सञ्चालन गरेको सहज परियोजना अन्तर्गत परिवार केन्द्रित पद्धती भित्रका २० परिवारमध्ये आर्थिक सशक्तिकरण तथा आय आर्जनको लागि उनीहरुलाई पूरा सेटका सिलाइ मेसिन प्रदान गरेको भिएसओका लैङ्गिक बिज्ञ सुनिलकुमार साहले जानकारी दिए । सिलाइ कटाइ व्यवसाय सञ्चालन गर्नमा सहयोग पु¥याउने प्रति मेसिन सेट ३० हजारका दरले खरिद गरी प्रदान गरिएको उनले बताए ।

प्रति परिवार सिलाइ मेसिन, इन्टरलक मेसिन, इलेक्ट्रीक आइरन, एक-एक थान, कैची, स्केल दुई-दुई थान, धागो, मेसिन सुई, बकम, चक मिटि, चेन, मोती लगायतको सिलाइ कटाइ सम्बन्धी सामग्री प्रदान गरिएको जिविकोपार्जनका सल्लाहकार रामनाथ साहले जानकारी दिए ।

राजविराज वार्ड नम्बर ६ अध्यक्ष प्रेम यादवले सिलाइ कटाइ मेसिन हस्तान्तरण कार्यक्रमको अध्यक्षता गर्दै घरायशी काममा सिमित महिलाहरुको लागि थप आय आर्जनको स्रोत बनेको बताए ।