डलर भन्दै कागजको पोको दिएर लाखौ लुट्ने खेलबहादुर र रेलबहादुरको गिरोह पक्राउ

११ असोज, भक्तपुर । डलर भन्दै कागजको पोको दिएर लाखौ रुपैयाँ लुट्ने गिरोह पक्राउ परेको छ । अहिलेसम्म डलर भन्दै कागजको पोको दिएर आधा करोड रुपैयाँभन्दा धेरै रकम लुट्ने सिन्धुपाल्चोक घर भएको गिरोह पक्राउ परेको हो ।

पक्राउ पर्नेमा सिन्धुपाल्चोकका ३६ वर्षीय खेलबहादुर तामाङको गिरोह छ । उनीसँगै ३३ वर्षीय रेलबहादुर तामाङ, ५६ वर्षीय श्यामबहादुर तामाङ, २५ वर्षीय रामकृष्ण तामाङ र ३२ वर्षीय कान्छी तामाङ पनि पक्राउ परेका भक्तपुरकी एसपी तारादेवी थापाले जानकारी दिइन् ।

यसरी डलर भन्दै रकम लुट्ने गिरोहमा अधिकांश बाह्रविसे नगरपालिकाका छन् । रेलबहादुर र खेलबहादुरको यो गिरोहले अहिलेसम्म ५५ लाख रुपैयाँ ठगी गरेको पाइएको एसपी थापाले बताइन् ।

गिरोले केही महिनायता ५ जनाभन्दा बढीलाई ठगी गरेपछि प्रहरीमा उजुरी परेको थियो । उजुरी परेपछि छानबिन थालेको प्रहरीले केही दिनयता गिरोहका मुख्य व्यक्तिलाई पक्राउ गरेर आइतबार सार्वजनिक गरेको हो । पक्राउ परेकाहरुको साथबाट केही रकम र मोबाइल समेत बरामद गरिएको छ ।