अबैध हतियार, घरेलु मदिरा र फरार अभियुक्तमाथि बोगटी कमाण्डको नजर

२३ कार्तिक, स्याङ्जा । प्रहरी उपरीक्षक होविन्द्र बोगटी प्रहरी प्रमुख भएर स्याङ्जा आएपछि अबैध हतियार, फरार अभियुक्त र अबैध घरेलु मदिरातर्फ निगरानी बढाएका छन् ।

जिल्ला प्रहरी कार्यालय स्याङ्जाले आज लुकाई छिपाई राखिएका अबैध हतियार बरामद गरेको छ । इजाजत विना लुकाई राखेका हातहतियार प्रति स्याङ्जा प्रहरीले निगरानी बढाउन थालेको हो । आईतवार स्याङ्जा प्रहरीले बिरुवा गाँउपालिकाबाट अबैध हतियारसहित एक जनालाई पक्राउ गरेको छ ।

जिल्ला प्रहरी कार्यालय स्याङ्जाका प्रवक्ता प्रहरी नायव उपरीक्षक राजेन्द्रप्रसाद अधिकारीले बिरुवा गाँउपालिका २ बेसारे डाँडा बस्ने बर्ष ३३ को भीमबहादुर गुरुङ्लाई हतियारसहित पक्राउ गरेको जानकारी दिए । विशेष सुराकीको आधारमा प्रहरीले गुरुङकाे घरगोठ खानतलासी गर्दा गोठमा काठको खलियामाथी सुकेको खरको घाँस र सुकेको मकैको डाठभित्र लुकाई राखेको अवस्थामा अबैध हतियार फेला परेको प्रवक्ता अधिकारीले बताए ।

गुरुङ्ले लुकाई राखेको अवस्थामा प्रहरीलेले एक नाले बन्दुक १ थान, भरुवा बन्दुकको नाल २ थान, फलाम र सिसाको जस्तो देखिने छर्रा १२ थान र ५५ ग्राम बारुद बरामद गरेको छ । बरामद सामाग्री सहित गुरुङलाई पक्राउ गरी जिल्ला अदालतबाट ७ दिनको म्याद थपेर थप अनुसनधान भएको प्रहरीले जनाएको छ ।

अबैध हातहतियारबाट चोरी शिकारीदेखि मानवीय घट्ना हुन सक्छ, जिल्ला प्रहरी प्रमुख प्रहरी उपरिक्षक बोगटीले भने, “शान्तिसुरक्षा मजबुत बनाउन जिल्ला प्रहरी स्याङ्जा अबैध हातहतियार बरामद गर्न लागी परेको छ ।” जिल्लाको शान्तिसुरक्षामा प्रहरीले कुनै कसुर बाँकी नराखेर काम गर्ने छ, प्रहरी प्रमुख बोगटीले भने । बोगटीले चालेकाे कदमका कारण समाजमा अपराधिक क्रियाकलाप न्युनिकरण हुने विश्वास स्याङ्जावासीले लिएका छन् ।